تەمىرجول ۆوكزالدارى ماگيسترالدىڭ ماڭىزدى بولىگى جانە كولىكپەن تاسىمالداۋ توراپتارى بولا وتىرىپ، ءارتۇرلى كولىك تۇرلەرىنىڭ ءوزارا بايلانىسىن قامتاماسىز ەتەدى.
ۆوكزالدار قىزمەتى قاۋىپسىزدىك، جولاۋشىلار ءۇشىن قولايلى جاعداي جاساپ، سەرۆيس قۇرۋ جانە قولجەتىمدى كولىك اعىنىن قامتاماسىز ەتۋ مۇمكىندىكتەرىمەن بايلانىستى. الەۋمەتتىك ماڭىزى بار نىساندار اپتانىڭ جەتى كۇنى 24 ساعات جۇمىس ىستەيدى، دەپ حابارلايدى aqshamnews.kz rail-news.kz-كە سىلتەمە جاساپ.
«قتج» ۇك» اق ماگيسترالدىق جەلى ديرەكسياسى فيليالىنىڭ ۆوكزال شارۋاشىلىعى جونىندەگى اتقارۋشى ديرەكتورى جۇبان كورپەبايەۆتىڭ ايتۋىنشا، بۇگىندە قازاقستاندا 301 ۆوكزال بار. ال كۇن سايىن قازاقستان تەمىر جولدارىمەن 139 جۇپ جولاۋشىلار پويىزى وتەدى. 59 ۆوكزال كلاستارعا جىكتەلەدى جانە تيىسىنشە قاۋىپسىزدىكتى، ونىڭ ىشىندە تەرروريزمگە قارسى قاۋىپسىزدىكتى قامتاماسىز ەتۋ بويىنشا تالاپتارعا ساي كەلەدى.
– ماسەلەن، ءبىرىنشى كلاستى جانە كلاستان تىس 14 ۆوكزال بار. ەكىنشى-ۇشىنشى كلاستى ۆوكزالداردا زاڭناماعا سايكەس تەكسەرۋ راسىمدەرى جۇرگىزىلمەيدى. الايدا، بۇل ۆوكزالدار بەينەباقىلاۋ، ءورت دابىلى جۇيەلەرىمەن جاراقتاندىرىلعان. جالپى، بيىل قازان ايىنداعى جاعداي بويىنشا تەكسەرۋ قىزمەتتەرى 200-دەن استام تىيىم سالىنعان زاتتاردى الىپ ءوتۋ ارەكەتىن انىقتادى. دەگەنمەن مۇنداي جاعدايلاردىڭ تومەندەۋ ءۇردىسى بايقالادى، – دەپ اتاپ ءوتتى ول.
كورپەبايەۆتىڭ ايتۋىنشا، كومپانيا ق ر ىىم-مەن بىرلەسىپ، ءتيىستى الگوريتمدەرى بار «اقىلدى كامەرالاردى» ورناتۋ ماسەلەسىن پىسىقتاۋدا، مىسالى ءبىر جەردە بىرنەشە ادامنىڭ جينالۋى، يەسىز قالعان زاتتار جانە ت. ب. بۇگىندە بۇل جوبا ءىرى ۆوكزالداردا پيلوتتىق رەجيمدە ىسكە اسىرىلۋدا. سونىمەن قاتار بۇگىنگى تاڭدا 7 ۆوكزال اكىمدىكتەردىڭ قاراماعىندا، ولار – الماتى-1، الماتى-2، شىمكەنت، تۇركىستان، پاۆلودار، ەكىباستۇز جانە اقسۋ ۆوكزالدارى. بۇل رەتتە جولاۋشىلاردى قابىلداۋ جانە جونەلتۋ، ۆوكزال بويىنشا كەزەكشىلەر، انىقتامالىق قىزمەتتەردىڭ جۇمىسى «قتج» ۇك» اق-عا جاتادى. وسى وبەكتىلەردىڭ عيماراتتارىن كۇتىپ ۇستاۋ جانە پايدالانۋ جاۋاپكەرشىلىگى قالا اكىمدىكتەرىنىڭ قۇزىرىندا.
سونداي-اق كومپانيا بۇگىندە ساۋدا الاڭدارىن جەكە پاۆيلوندارعا ءبولۋ ماسەلەسىن قاراستىرۋدا. جاقىن بولاشاققا جوسپارلانعان جۇمىستار قاتارىندا استانا-1 ۆوكزالىن كۇردەلى جوندەۋ، شۋ ۆوكزالىندا دا ءبىرقاتار جۇمىستار جۇرگىزۋ بار. قىسقاسى، سالانىڭ الەۋمەتتىك وبەكتىلەرى بولىپ سانالاتىن، سونداي-اق نەگىزگى ستراتەگيالىق ءرول اتقاراتىن تەمىرجول ۆوكزالدارىنىڭ دامۋىنا ۇنەمى نازار اۋدارىلىپ، ونىڭ قىزمەتى باستى نازاردا بولادى.