الماتى اكىمى ەربولات دوسايەۆ جاڭا ستاندارت بويىنشا اباتتاندىرىلعان اۋلالارمەن تانىستى
اۋەزوۆ اۋدانىنا جۇمىس ساپارى بارىسىندا الماتى اكىمى ەربولات دوسايەۆ «حالىق قاتىساتىن بيۋدجەت» باعدارلاماسى اياسىندا كورىكتەندىرىلگەن اۋلا اۋماعىن كوردى، دەپ حابارلايدى aqshamnews.kz
الماتىدا اۋلالاردى اۋقىمدى جاڭارتۋ جۇمىستارى مەملەكەت باسشىسىنىڭ جايلى ءارى ءقاۋىپسىز ءومىر ءسۇرۋ جاعداي جاساۋ جونىندەگى تاپسىرماسىنا سايكەس جۇزەگە اسىرىلۋدا. اۋەزوۆ اۋدانىندا 966 اۋلا بار، ولاردىڭ 500ء-ى اعىمداعى جانە كۇردەلى جوندەۋدى قاجەت ەتەدى. بىلتىر اۋەزوۆ اۋدانىندا 174-تەن استام اۋلادا جوندەۋ جۇمىستارى جۇرگىزىلدى. بيىل 23 اۋلاعا كۇردەلى جوندەۋ جاسالسا، تاعى 137 اۋلاعا جوبالاۋ-سمەتالىق قۇجاتتاما ازىرلەنۋدە.
اۋلالاردى اباتتاندىرۋ سونىمەن قاتار «حالىق قاتىساتىن بيۋدجەت» باعدارلاماسى اياسىندا جۇرگىزىلەدى. بيىل اۋەزوۆ اۋدانىندا 57 جوبا جۇزەگە اسىرىلادى، ونىڭ ىشىندە 41 اۋلانى اباتتاندىرۋ قاراستىرىلعان، سولاردىڭ ءبىرى – №2 شاعىن اۋدانداعى 41 جانە 42 ۇيلەر اراسىنداعى اۋلا.
اۋلا اۋماعى «الماتىباسجوسپار» عىلىمي-زەرتتەۋ ينستيتۋتىنىڭ ادىستەمەلىك نۇسقاۋلىعىنا سايكەس كۇردەلى جوندەۋدەن ءوتتى. وندا ءاربىر اۋلانى كورىكتەندىرۋدىڭ ستاندارتى مەن وزىندىك ەرەكشەلىگى ەسكەرىلگەن. اۋلادا بالالار جانە سپورت الاڭدارى سالىندى، 19 كوشە جارىقتاندىرۋ باعاناسى، 12 بەينەباقىلاۋ كامەراسى ورناتىلدى، 390 شارشى مەترلىك فۋتبول الاڭى سالىندى، 300 مەترلىك جاسىل قورشاۋ جانە 50 اعاش وتىرعىزىلدى. سونىمەن قاتار، 3 مىڭ شارشى مەتردەن اساتىن جاسىل ايماققا اۆتوسۋارۋ جۇيەسى مەن 400 مەترلىك تروتۋار ورناتىلدى.
«جاڭارتىلعان اۋلامىز بىزگە وتە ۇنايدى – بالالارمەن سەرۋەندەيتىن انالار ءۇشىن وتە قولايلى، بىزگە ءتىپتى باسقا اۋلالاردىڭ تۇرعىندارى كەلىپ، ۋاقىتىن وسىندا وتكىزەدى. بۇرىنعى كۇيىمەن سالىستىرعاندا ايىرماشىلىق ۇلكەن – ەۋروپا بىزگە كەلگەندەي! ءبىز اۋلامىزدىڭ اباتتاندىرۋ جۇمىستارىنا بەلسەنە قاتىسىپ، ونى قولايلى ەتۋ ءۇشىن ۇسىنىس بىلدىردىك. پىكىرلەرىمىزدى ەسكەرگەندەرىڭىزگە راحمەت!»، – دەپ تۇرعىندار الماتى اكىمىنە العىس ءبىلدىردى.
قالا باسشىسى حالىق تىعىز ورنالاسقان جانە كوپقاباتتى ۇيلەر كوپ شوعىرلانعان اۋەزوۆ اۋدانىندا اۋلالاردى اباتتاندىرۋ جانە جاڭارتۋ باستى مىندەت ەكەنىن اتاپ ءوتتى. ەربولات دوسايەۆتىڭ ايتۋىنشا، اباتتاندىرۋ جاڭا ستاندارت بويىنشا جۇرگىزىلۋدە، مۇندا ساپا مەن قاۋىپسىزدىك تالاپتارى ەسكەرىلگەن – بەينەباقىلاۋ، جارىقتاندىرۋ، اۆتوسۋارعىشپەن جابدىقتالعان كوگالداندىرۋ جۇيەلەرى ورناتىلادى. وسىلايشا، قالا تۇرعىندارىنا جايلى جاعدايلار جاسالۋدا.