2028 جىلدان باستاپ SOS باتىرماسى جوق كولىكتەر قازاقستاندا تىركەۋگە الىنبايدى، دەپ حابارلايدى Aqshamnews.kz ءتىلشىسى Informburo ارناسىنا سىلتەمە جاساپ.
ونەركاسىپ جانە قۇرىلىس مينيسترلىگىنىڭ مالىمەتىنشە، جاڭا تالاپ كەدەن وداعىنىڭ تەحنيكالىق رەگلامەنتىنە سايكەس ەنگىزىلمەك. ەرەجە ەۋرازيالىق ەكونوميكالىق وداققا مۇشە ەلدەردىڭ بارلىعىنا ورتاق بولادى.
ماسەلەن، رەسەي مەن قىرعىزستاننان اكەلىنەتىن كولىكتەرگە شەكارادان وتپەي تۇرىپ توتەنشە جاعداي كەزىندە شۇعىل قىزمەتتەرگە اۆتوماتتى تۇردە بەلگى بەرەتىن SOS جۇيەسى ورناتىلۋى ءتيىس. ەگەر اتالعان جۇيە بولماسا، مۇنداي كولىكتەردى قازاقستان اۋماعىندا پايدالانۋعا ءارى تىركەۋگە رۇقسات بەرىلمەيدى. سونداي-اق ساتىلىم كەزىندە دە وسى تالاپ ەسكەرىلۋى قاجەت. ال ەل ىشىندە بۇرىننان جۇرگەن اۆتوكولىك يەلەرىنە SOS باتىرماسىن ورناتۋ مىندەتتەلمەيدى.
"قازاقستاندىقتار كولىكتى كەدەن وداعىنا مۇشە مەملەكەتتەردەن ساتىپ الاردا ونىڭ تەحنيكالىق رەگلامەنتكە سايكەستىگىن الدىن الا تەكسەرىپ العانى ءجون. ەگەر كولىك تالاپقا ساي كەلمەسە، ونى تىركەۋگە قويۋ مۇمكىن ەمەس. مۇنداي جاعدايدا كولىكتى قايتا الىپ كەتۋگە تۋرا كەلەدى. بۇل – قوسىمشا شىعىن جانە قايتا ەكسپورتتاۋدىڭ ءوزى ۇلكەن ماسەلەگە اينالۋى مۇمكىن"، – دەدى Qazautostandart اۆتوكولىك ساراپشىلارى مەن اۋديتورلار قاۋىمداستىعى زاڭدى تۇلعالار بىرلەستىگىنىڭ پرەزيدەنتى ەربول سەيپيلوۆ.