1،4 ملن ادام تۇراتىن قالالاردا 32 قالا قۇراۋشى كاسىپورىن جۇمىس ىستەيدى
ق ر پرەمەر-مينيسترى ءاليحان سمايىلوۆتىڭ توراعالىعىمەن وتكەن ەكونوميكانى جاڭعىرتۋ ماسەلەلەرى جونىندەگى مەملەكەتتىك كوميسسيانىڭ وتىرىسىندا مونوقالالاردى دامىتۋ جونىندەگى جوسپارلار قارالدى، دەپ حابارلايدى primeminister.kz.
ۇلتتىق ەكونوميكا ءمينيسترى الىبەك قۋانتىروۆ قازىرگى ۋاقىتتا رەسپۋبليكادا 27 مونوقالا بار ەكەنىن باياندادى.
1،4 ملن ادام تۇراتىن قالالاردا 32 قالا قۇراۋشى كاسىپورىن جۇمىس ىستەيدى.
2015 جىلدان 2021 جىلعا دەيىن اتالعان ەلدى مەكەندەردە ونەركاسىپ ءوندىرىسىنىڭ كولەمى 6،3-تەن 11،2 ترلن تەڭگەگە دەيىن ءوستى، بۇل - ەل بويىنشا جالپى كورسەتكىشتىڭ 29 پايىزى.
بۇگىنگى تاڭدا 2،1 ترلن تەڭگەگە 86 «زاكىرلى» جوبانىڭ پۋلى قالىپتاستىرىلدى.
بۇل جوبالار مونوقالالاردا تاۋ-كەن مەتاللۋرگيا جانە حيميا ونەركاسىبى، اۋىل شارۋاشىلىعى، قۇرىلىس، ماشينا جاساۋ جانە باسقا سالالاردا 18 مىڭنان استام جۇمىس ورنىن اشتى.
جالپى، ولاردى ودان ءارى دامىتۋ ءۇشىن تۇرعىن ءۇي قورى مەن ينجەنەرلىك ينفراقۇرىلىم وبەكتىلەرىنە كۇردەلى جوندەۋ جۇرگىزۋگە بيۋدجەتتەن بولىنەتىن قاراجاتتىڭ جىل سايىنعى ءليميتىن ۇلعايتۋ، ەلدى مەكەندەردىڭ الەۋمەتتىك ماڭىزى بار پروبلەمالارىن شەشۋ بويىنشا ماستەر-جوسپارلار ازىرلەۋ، سونداي-اق جاڭا ينۆەستيسيالىق جوبالاردى ىسكە اسىرۋ جونىندەگى جۇمىستى جانداندىرۋ ۇسىنىلادى.
بۇل تاسىلدەر قولداۋ تاپتى.
وسى ورايدا ءاليحان سمايىلوۆ مەملەكەت باسشىسى بەكىتكەن دامۋ باعدارلامالارىن ورىنداۋ كەزىندە ۆەدومستۆوارالىق ۇيلەستىرۋدى كۇشەيتۋ، سونداي-اق وڭىرلىك ەكونوميكانى ءارتاراپتاندىرۋ جانە ازاماتتاردى جۇمىسپەن قامتۋ ءۇشىن كەلەشەگى بار «زاكىرلى» جوبالاردىڭ تىزبەسىن وزەكتەندىرۋ قاجەتتىگىن اتاپ ءوتتى.
سونىمەن قاتار وتىرىستا تەمىرجول ماشيناسىن جاساۋ جانە اگروونەركاسىپ كەشەنى سالالارىنداعى وزەكتى ماسەلەلەر قارالدى.