قازاقستاندا 2030 جىلعا قاراي جىلىنا 270 مىڭ توننا بالىق ءوسىرۋ جوسپارلانۋدا
«بالىق شارۋاشىلىعىن دامىتۋ تۋرالى» تاقىرىبىندا بريفينگتە ق ر ەكولوگيا، گەولوگيا جانە تابيعي رەسۋرستار مينيسترلىگى بالىق شارۋاشىلىعى كوميتەتىنىڭ ءتوراعاسى ناريمان ءجۇنىسوۆ 2030 جىلعا قاراي وسىرىلگەن بالىق كولەمىن جىلىنا 270 مىڭ تونناعا دەيىن ۇلعايتۋ مىندەتى قويىلعانىنىن اتاپ ءوتتى، دەپ حابارلايدى Almaty-akshamy.kz ق ر ەكولوگيا، تابيعي رەسۋرستار مينيسترلىگىنىڭ تاراتقان حابارىنا سىلتەمە جاساپ.
2030 جىلعا دەيىن 1283 جاڭا بالىق ءوسىرۋ شارۋاشىلىعى قۇرىلادى جانە جۇمىس ىستەپ تۇرعان 288 شارۋاشىلىقتى ءوسىرۋ كولەمى ۇلعايتىلادى.
قويىلعان ماقساتتارعا قول جەتكىزۋ ءۇشىن 10 جىل ىشىندە 340 ملرد.تەڭگە جەكە ينۆەستيسيالار تارتۋ جانە مەملەكەتتىك بيۋدجەتتەن شامامەن 200 ملرد. تەڭگە ءبولۋ كوزدەلىپ وتىر.
2021 جىلى جۇمىس ىستەپ تۇرعان بالىق ءوسىرۋ شارۋاشىلىقتارى ەسەبىنەن 12،8 مىڭ توننا بالىق ءوسىرۋ كۇتىلۋدە. جەدەل مالىمەتتەر بويىنشا، جىل باسىنان بەرى شامامەن 7،6 مىڭ توننا تاۋارلى بالىق ءوسىرىلدى.
ماسەلەن، 2021 جىلدىڭ باسىنان باستاپ مەملەكەتتىك ينسپەكتورلار 1800-گە جۋىق اكىمشىلىك قۇقىقبۇزۋشىلىقتى انىقتاپ، 23،2 ملن.تەڭگە ايىپپۇل سالدى، ونىڭ 15،4 ملن. تەڭگەسى ءوندىرىلىپ الىندى. سپيكەر سونداي-اق كوميتەت وتكىزەتىن «بەكىرە»، «ۋىلدىرىق شاشۋ»، «تازا سۋ ايدىندارى» تابيعاتتى قورعاۋ اكسياسىنىڭ قورىتىندىلارى تۋرالى حابارلادى.
انىقتاما
قازاقستاننىڭ اۋقىمدى بالىق شارۋاشىلىعى قورى بار. سالانىڭ عالىمدارى مەن ساراپشىلارىنىڭ باعالاۋى بويىنشا، بالىق شارۋاشىلىعىنىڭ الەۋەتى جىلىنا 600 مىڭ توننا تاۋارلىق بالىققا باعالانادى. مەملەكەت باسشىسى ق.توقايەۆتىڭ 2020 جىلعى 1 قىركۇيەكتەگى «جاڭا جاعدايداعى قازاقستان: ءىس-قيمىل كەزەڭى» اتتى قازاقستان حالقىنا جولداۋىندا ەلىمىزدىڭ بالىق سالاسىن دامىتۋعا ەرەكشە نازار اۋدارۋ قاجەتتىگى اتاپ ءوتىلدى. وسىعان بايلانىستى، قازاقستان رەسپۋبليكاسى ۇكىمەتىنىڭ 2020 جىلعى 31 جەلتوقسانداعى № 955 قاۋلىسىمەن ق ر ەگترم بالىق شارۋاشىلىعى كوميتەتى قۇرىلدى.