2025 جىلدىڭ سوڭىنا دەيىن 24 ەت كومبيناتىن پايدالانۋعا بەرۋ جوسپارلانۋدا.
قازاقستان ۇكىمەتى ەلدەگى ەت كومبيناتىنىڭ سانى وسەتىنىن اتىپ وتىر، دەپ حابارلادى Almaty-akshamy.kz Eldala.kz سىلتەمە جاساپ.
قازىرگى ۋاقىتتا قازاقستان سيىر ەتى، جىلقى ەتى، شوشقا ەتى بويىنشا ىشكى قاجەتتىلىكتى 80%-عا، ال شۇجىق ونىمدەرى بويىنشا 56،4%-عا قامتاماسىز ەتەدى. يمپورتتى الماستىرۋ باعدارلاماسى اياسىندا 2025 جىلدىڭ سوڭىنا دەيىن 24 ەت كومبيناتىن پايدالانۋعا بەرۋ جوسپارلانۋدا، ونىڭ جەتەۋى اعىمداعى جىلى ىسكە قوسىلادى. بۇل تۋرالى بۇگىن ۇكىمەت وتىرىسىندا اۋىل شارۋاشىلىعى ءمينيسترى ەربول قاراشوكەيەۆ مالىمدەدى.
«2022 جىلعا ينۆەستيسيالىق جوبالاردى ىسكە اسىرۋ جوسپارلانعان، ونىڭ ىشىندە جەتى ەت كومبيناتى، 10 ءسۇت وڭدەۋ زاۋىتى، قۇس فابريكالارىن سالۋ جانە كەڭەيتۋ بويىنشا 10 جوبا بار. بۇل جوبالار 13 وڭىردە جالپى سوماسى 38 ملرد تەڭگەگە جۇزەگە اسىرىلادى. سونىڭ سالدارىنان 1،7 مىڭنان استام جۇمىس ورنىن قۇرۋ جوسپارلانىپ وتىر»، - دەدى مينيستر.
اۋىل شارۋاشىلىعى مينيسترلىگىنىڭ دەرەكتەرى بويىنشا، 2021 جىلى شۇجىق ونىمدەرى يمپورتىنىڭ ۇلەسى 47 مىڭ توننانى قۇرادى، ال ءوز ءوندىرىسى 60،7 مىڭ توننانى قۇرادى. 2025 جىلدىڭ سوڭىنا دەيىن ەت وڭدەۋ بويىنشا 24 ينۆەستيسيالىق جوبانى ىسكە اسىرۋ، ونىڭ ىشىندە جالپى وندىرىستىك قۋاتى 87،4 مىڭ توننا شۇجىق ونىمدەرىن شىعاراتىن ءتورت ءىرى كاسىپورىندى ىسكە قوسۋ جوسپارلانۋدا.
قۇس ەتى بويىنشا ءوز وندىرىسىمەن قامتاماسىز ەتۋ بۇگىنگى كۇنى 65،4%-عا باعالانادى.
«2021 جىلى قۇس ەتى بويىنشا يمپورت ۇلەسى 168،5 مىڭ توننانى قۇرادى، مەنشىكتى ءوندىرىس 282،3 مىڭ توننانى قۇرادى. جالپى، وندىرىستىك قۋاتى جىلىنا 223،1 مىڭ توننا بولاتىن 23 قۇس فابريكاسىن سالۋ جانە جاڭعىرتۋ ەسەبىنەن 2025 جىلعا قاراي يمپورتتى تولىق الماستىرۋ جوسپارلانىپ وتىر»، - دەدى ەربول قاراشوكەيەۆ.
اعىمداعى جىلى قۇس فابريكالارىن سالۋ جانە كەڭەيتۋ بويىنشا 10 جوبانى ىسكە اسىرۋ جوسپارلانۋدا. ولاردىڭ ىشىندەگى ەڭ ءىرىسى - باتىس قازاقستان، سولتۇستىك قازاقستان جانە قىزىلوردا وبلىستارىندا قۇس ەتىن ءوندىرۋ بويىنشا جالپى ينۆەستيسيا سوماسى 10،4 ملرد تەڭگەنى قۇرايتىن ءۇش جوبا.