2024 جىلعى 1 جەلتوقسانداعى جاعداي بويىنشا جەرگىلىكتى اتقارۋشى ورگانداردىڭ رۇقساتىمەن قازاقستان اۋماعىندا 13 743 شەتەل ازاماتى ەڭبەك ەتەدى، دەپ حابارلايدى aqshamnews.kz ەڭبەك جانە حالىقتى الەۋمەتتىك قورعاۋ مينيسترلىگىنە سىلتەمە جاساپ.
شەتەل جۇمىس كۇشىن تارتۋعا رۇقساتتاردىڭ اراسىندا مىناداي ساناتتار بار: باسشىلار مەن ولاردىڭ ورىنباسارلارى ءۇشىن 564 رۇقسات (ءبىرىنشى سانات)، قۇرىلىمدىق بولىمشەلەردىڭ باسشىلارى ءۇشىن 2 585 رۇقسات (ەكىنشى سانات). تارتىلعان شجك نەگىزگى بولىگى ءۇشىنشى (ماماندار) جانە ءتورتىنشى (بىلىكتى جۇمىسشىلار) ساناتتارعا جاتادى – تيىسىنشە ولار 4 913 جانە 999 ادام. سونداي-اق ماۋسىمدىق جۇمىستارعا 1 186 ادام، ال كورپوراتيۆتىك اۋىستىرۋ اياسىندا 3 496 ادام تارتىلدى.
قازىرگى ۋاقىتتا قازاقستاندا شجك پايدالاناتىن 1 744 جۇمىس بەرۋشى بار. ولاردا 388 مىڭنان استام قازاقستان ازاماتى جۇمىس ىستەيدى، بۇل قىزمەتكەرلەردىڭ جالپى سانىنىڭ 96،5% - ى.
ەكونوميكالىق قىزمەت تۇرلەرى بويىنشا ەڭ كوپ جۇمىس ىستەيتىندەر قۇرىلىس سالاسىندا – 5 390 ادام، وڭدەۋ ونەركاسىبى – 1 455 ادام، تاۋ – كەن ونەركاسىبى جانە كارەرلەردى قازۋ – 1 355 ادام، اكىمشىلىك جانە كومەكشى قىزمەتتەر – 1 305 ادام، اۋىل، ورمان جانە بالىق شارۋاشىلىعى – 1 237 ادام.
ەڭبەك ميگرانتتارى كەلەتىن نەگىزگى ەلدەر: جۇڭگو – 4 881 ادام، وزبەكستان – 1 273 ادام، تۇركيا – 1 203 ادام، ءۇندىستان – 1 095 ادام.
ىشكى ەڭبەك نارىعىن قورعاۋ ماقساتىندا ق ر ەڭبەك جانە حالىقتى الەۋمەتتىك قورعاۋ مينيسترلىگى جىل سايىن رەسپۋبليكاعا شەتەل ماماندارىن تارتۋعا كۆوتا بەلگىلەيدى جانە بولەدى. 2024 جىلى جالپى كۆوتا رەسپۋبليكاداعى جۇمىس كۇشىنىڭ سانىنا قاتىستى 0،23% نەمەسە 22 مىڭ بىرلىك مولشەرىندە بەلگىلەندى، وسى جىلى قاراشادان باستاپ ءمينيستردىڭ بۇيرىعىمەن 17،2 مىڭ بىرلىككە دەيىن قىسقارتىلدى.