10،7 مىڭ ادام جۇمىسقا ورنالاستىرىلدى.
بۇل 2020-2021 جىلدارعا ارنالعان جۇمىسپەن قامتۋدىڭ جول كارتاسى شاراسى اياسىندا ىستەلگەن جۇمىستار، دەپ حابارلايدى Almaty-akshamy.kz ق ر ەڭبەك جانە حالىقتى الەۋمەتتىك قورعاۋ مينيسترلىگىنىڭ باسپا ءسوز قىزمەتىنە سىلتەمە جاساپ.
2021 جىلى 2020-2021 جىلدارعا ارنالعان جۇمىسپەن قامتۋدىڭ جول كارتاسى (بۇدان ءارى – جقجك) شەڭبەرىندە 12،3 مىڭ جۇمىس ورنى قۇرىلدى، ولاردىڭ باسىم بولىگى ىسكە اسىرىلىپ جاتقان ينفراقۇرىلىمدىق جوبالار شەڭبەرىندە قامتاماسىز ەتىلدى.
جقجك جوبالارى 4 نەگىزگى باعىتقا بولىنگەن:
– حالىقتىڭ ءومىر ءسۇرۋ ساپاسىن ارتتىرۋ؛
– شوب ءۇشىن قارجىلاندىرۋدىڭ قولجەتىمدىلىگىن ارتتىرۋ؛
– اگروونەركاسىپتىك كەشەندى دامىتۋ؛
– وڭىرلەردە بيزنەستى دامىتۋ.
قازىرگى ۋاقىتتا جقجك ءبىرىنشى باعىتى اياسىندا قۇرىلىس جۇمىستارى 248 ينفراقۇرىلىمدىق جوبادا جۇرگىزىلۋدە، ونىڭ ىشىندە 43 جوبادا (جامبىل وبلىسىندا – 25، شىمكەنت قالاسىندا – 6، پاۆلودار وبلىسىندا – 4، قوستاناي وبلىسىندا جانە باتىس قازاقستان وبلىسىندا – 2 جانە اقمولا، اتىراۋ، شىعىس قازاقستان وبلىستارىندا جانە نۇر-سۇلتان قالاسىندا 1-دەن) قۇرىلىس جۇمىستارى اياقتالدى جانە ولاردا 382 تۇراقتى جۇمىس ورنى قۇرىلدى (نۇر-سۇلتان قالاسىندا – 125، قوستاناي وبلىسىندا – 103، جامبىل وبلىسىندا – 90، اتىراۋ، شىعىس قازاقستان – 30 جانە شىمكەنت قالاسىندا – 27).
وسىلايشا، ءبىرىنشى باعىتتىڭ ىسكە اسىرىلىپ جاتقان جوبالارى اياسىندا 10،7 مىڭ ادام جۇمىسقا ورنالاستىرىلدى.
بۇدان باسقا، ينفراقۇرىلىمدىق جوبالار ەكونوميكانىڭ ءتۇرلى سالالارىن، اسىرەسە، قۇرىلىس سالاسىن دامىتۋعا سەرپىن بەردى. وتاندىق بيزنەس وكىلدەرىنەن تاۋارلار مەن قىزمەتتەرگە بارلىعى 52 ملرد تەڭگەگە جۋىق تاپسىرىستار جاسالعان.
ايتا كەتۋ كەرەك، جوبالاردى ىسكە اسىرۋ مەرزىمى جقجك-نىڭ قولدانىلۋ مەرزىمىنەن اسىپ تۇسەدى جانە ولاردى ودان ءارى ىسكە اسىرۋ جەرگىلىكتى بيۋدجەت قاراجاتى ەسەبىنەن جۇزەگە اسىرىلاتىن بولادى، ال قۇرىلىس جۇمىستارى اياقتالىپ، وبەكتىلەر پايدالانۋعا بەرىلگەننەن كەيىن ولاردا تۇراقتى جۇمىس ورىندارى قۇرىلاتىن بولادى.
جقجك ەكىنشى باعىتى اياسىندا ءوز ءىسىن اشۋ نەمەسە دامىتۋ ءۇشىن جالپى سوماسى 7 ملرد تەڭگەگە 1،3 مىڭ شاعىن نەسيە بەرىلدى، بۇل 1،2 مىڭ تۇراقتى جۇمىس ورنىن قۇرۋعا مۇمكىندىك بەردى.
اگروونەركاسىپتىك كەشەندى دامىتۋ شەڭبەرىندە اۋىل شارۋاشىلىعى مينيسترلىگى «بايتەرەك» ۇبح» اق-مەن بىرلەسىپ، جالپى سوماسى 100 ملرد تەڭگەگە 41 ينۆەستيسيالىق جوبانى ىسكە اسىرۋدا. بۇگىنگى تاڭدا 50 ملرد تەڭگە سوماسىنا 13 ينۆەستيسيالىق جوبا قارجىلاندىرىلدى.
وسىلايشا، جقجك-نىڭ بارلىق جوبالارى اياقتالعاننان كەيىن 4 باعىت بويىنشا 42،5 مىڭ جۇمىس ورنىن قۇرۋ جوسپارلانعان، ونىڭ 28،8 مىڭنان استامى (68%) تۇراقتى بولادى.
ەستەرىڭىزگە سالا كەتەيىك، 2020 جىلى جقجك اياسىندا 6،7 مىڭ ينفراقۇرىلىمدىق جوبانى ىسكە اسىرۋ كەزىندە ورتاشا جالاقىسى 130 مىڭ تەڭگە بولاتىن 239 مىڭ ادام جۇمىسپەن قامتىلدى.
جۇمىس ىزدەپ جۇرگەن قازاقستاندىقتار تۇرعىلىقتى جەرى بويىنشا حالىقتى جۇمىسپەن قامتۋ ورتالىقتارىنا (بۇدان ءارى – حجقو) جۇگىنۋ جولىمەن جقجك شەڭبەرىندە ينفراقۇرىلىمدىق جوبالاردى ىسكە اسىرۋعا قاتىسا الادى.
حجقو جۇمىسپەن قامتۋ ورگاندارىندا جۇمىس ىزدەپ جۇرگەن ادامدار، جۇمىسسىزدار، سونداي-اق جۇمىستان بوساتىلعان ادامدار، جالاقىسى ساقتالمايتىن دەمالىستاعى ادامدار، ستۋدەنتتەر، ونىڭ ىشىندە ۋاقىتشا تىركەلگەن ادامدار قاتارىنان قاجەتتى بىلىكتى مامانداردى ىرىكتەۋدى جۇزەگە اسىرادى جانە ينفراقۇرىلىمدىق جوبانى ىسكە اسىراتىن جۇمىس بەرۋشى-مەردىگەرگە جىبەرەدى.
حجقو ارقىلى ينفراقۇرىلىمدىق جوبالارعا جۇمىسقا ورنالاسۋ كەزىندە جۇمىسسىز جاستارعا، NEET ساناتىنداعى جاستارعا، سونداي-اق دەنساۋلىعىنا زيان كەلتىرمەيتىن جانە وقۋ پروسەسىن بۇزبايتىن جۇمىستاردا ستۋدەنتتەرگە باسىمدىق بەرىلەدى.
حجقو قاجەت بولعان جاعدايدا ينفراقۇرىلىمدىق جوباعا جۇمىسقا ورنالاسۋ كەپىلدىگىمەن ءتيىستى جۇمىستاردى ورىنداۋ ءۇشىن جۇمىس بەرۋشى-مەردىگەردىڭ/قوسالقى مەردىگەردىڭ وتىنىمدەرى بويىنشا كادرلاردى قايتا دايارلاۋدى قامتاماسىز ەتەدى.
حجقو باعىتتارى بويىنشا جۇمىسقا ورنالاسقانداردىڭ جالاقى مولشەرى سالىقتاردى، الەۋمەتتىك تولەمدەردى جانە ەكولوگيالىق ۇستەمەاقىلار بويىنشا تولەمدەردى ەسەپكە الماعاندا، پايدالانىلماعان ەڭبەك دەمالىسى ءۇشىن وتەماقىنى ەسكەرە وتىرىپ، جالاقىنىڭ ەڭ تومەنگى ەكى مولشەرىنەن كەم ەمەس دەڭگەيدە بەلگىلەنەدى.