قازاقستان مەكتەپتەرىندە «100 مەدياتيۆتى مەكتەپ» جوباسى ىسكە قوسىلدى. بۇل باستاما ەلدەگى بارلىق ءبىلىم بەرۋ ۇيىمدارىندا ءقاۋىپسىز جانە قولداۋشى ورتانى قالىپتاستىرۋعا باعىتتالعان. جوبانىڭ باستى ماقساتى – قاقتىعىستاردى ءتيىمدى شەشىپ، وقۋشىلار، پەداگوگتەر جانە اتا-انالار ءۇشىن جاعىمسىز سالداردىڭ الدىن الۋ، دەپ حابارلايدى aqshamnews.kz
جوبا اياسىندا مەكتەپ مەدياسياسى قىزمەتتەرى قۇرىلىپ، بىرەگەي ادىستەمەلىك ۇسىنىمدارمەن قامتاماسىز ەتىلدى. ى.التىنسارين اتىنداعى ۇلتتىق ءبىلىم اكادەمياسى ازىرلەگەن ۇسىنىمدار مەكتەپ مەدياسياسىن ۇيىمداستىرۋدىڭ تەوريالىق جانە پراكتيكالىق ماتەريالدارىن قامتيدى. بۇل قۇجاتتار مەكتەپتەردە مەدياتيۆتىك پراكتيكالاردى ەنگىزۋگە نەگىز بولىپ، مەدياتيۆتى قىزمەتتەردىڭ تيىمدىلىگىن ارتتىرادى.
جوبانىڭ نەگىزگى ماقساتى – قيىن ومىرلىك جاعدايلاردا وقۋشىلارعا قولداۋ كورسەتۋ، وتباسىلىق جانە مەكتەپىشىلىك داۋلاردى شەشۋ، سونداي-اق مەدياتيۆتىك ادىستەر ارقىلى وقۋشىلاردىڭ دامۋ مۇمكىندىكتەرىن ارتتىرۋ. سونىمەن قاتار، مەكتەپتەردەگى پسيحولوگيالىق احۋالدى جاقسارتۋ جانە داۋلى جاعدايلاردىڭ سانىن ازايتۋ كوزدەلگەن.
مەدياسيا قىزمەتتەرىنە ءارتۇرلى الەۋمەتتىك توپتاردىڭ وكىلدەرى تارتىلادى، ولار:
- جوعارى سىنىپ وقۋشىلارى،
- پەداگوگتەر مەن پەداگوگ-پسيحولوگتار،
- الەۋمەتتىك پەداگوگتەر،
- اتا-انالار،
- ۇكىمەتتىك ەمەس ۇيىمداردىڭ، قامقورشىلىق كەڭەستەردىڭ جانە اعا ۇرپاقتىڭ وكىلدەرى.
ق ر وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتىنىڭ ءتوراعاسى ناسىمجان وسپانوۆا بۇل جوبانىڭ ماڭىزدىلىعىن ەرەكشە اتاپ ءوتتى. ونىڭ ايتۋىنشا، مەدياتيۆتىك پراكتيكا وقۋ ورىندارىنداعى پسيحولوگيالىق احۋالدى جاقسارتىپ، وقۋشىلاردىڭ الەۋمەتتەنۋىنە ىقپال ەتەدى. سونىمەن قاتار، وتباسىلىق-قۇقىقتىق داۋلاردى شەشۋگە جاردەمدەسۋ جانە مەكتەپتەردەگى جالپى جاعدايدى جاقسارتۋ ارقىلى قوعامداعى بەيبىتشىلىككە ۇلەس قوسادى.
بۇل جوبا مەكتەپتەردەگى تاربيە جۇمىسىن جاڭا دەڭگەيگە كوتەرىپ، وقۋشىلار مەن اتا-انالاردىڭ اراسىنداعى ءوزارا تۇسىنىستىكتى نىعايتۋعا سەپتىگىن تيگىزەدى. «100 مەدياتيۆتى مەكتەپ» جوباسى قازاقستاننىڭ ءبىلىم بەرۋ سالاسىندا ۇلكەن جاڭالىق بولماق.