قىركۇيەك ايىندا 1-سىنىپ ساباقتارى 35 مينۋتتان وتەدى.
قازاقستاندا 1-سىنىپتاردى وقىتۋدىڭ «ساتىلى» رەجيمى بولادى، دەپ حابارلايدى Almaty-akshamy.kz وقۋ-اعارتۋ مينيسترلىگىنىڭ باسپا ءسوز قىزمەتىنە سىلتەمە جاساپ.
«قىركۇيەكتە ءۇش ساباق 35 مينۋتتان وتەدى. قازان ايىنان باستاپ دەنە شىنىقتىرۋ جانە كوزگە ارنالعان گيمناستيكا قوسىلىپ، ساباقتىڭ ءارقايسىسى 45 مينۋتتان بولادى»، - دەپ مالىمدەدى وقۋ-اعارتۋ مينيسترلىگىنىڭ باسپا ءسوز قىزمەتى.
بۇرىن ءبىرىنشى سىنىپ وقۋشىلارىنىڭ ساباعى ءارقايسىسى 40 مينۋتتان بولاتىن ەدى.
سونىمەن قاتار ءبىرىنشى سىنىپتاردا كوركەم ەڭبەك ساباعى «ەڭبەككە باۋلۋ» جانە «بەينەلەۋ ونەرى» دەگەن ەكى پانگە بولىنەدى. 1-سىنىپتا وقۋ جىلىنىڭ ۇزاقتىعى 35 وقۋ اپتاسىنان تۇرادى.
«قازاق تىلىندە وقىتاتىن مەكتەپتەردە «الىپپە» جانە «انا ءتىلى» پاندەرى، قازاق تىلىندە وقىتپايتىن مەكتەپتەردە «بۋكۆار» جانە «وبۋچەنيە گراموتە»، «كازاحسكيي يازىك» پاندەرى وقىتىلادى»، - دەلىنگەن وقۋ-اعارتۋ مينيسترلىگىنىڭ باسپا ءسوز قىزمەتى تاراتقان اقپاراتتا.
1-سىنىپتا وقۋشىلارعا باعا قويىلمايدى.