قازاقستان – ۆەتنام اراسىندا تىكەلەي اۋە رەيسى اشىلدى

وسى قازاننان باستاپ الماتىدان ۆەتنامنىڭ نياچانگ قالاسىنا العاشقى اۋە رەيسى ۇشادى

ەندىگى ۋاقىتتا قازاقستاندىقتار ۆەتنامعا تىكەلەي ۇشا الادى، دەپ حابارلايدى Almaty-akshamy.kz قازاقپاراتقا سىلتەمە جاساپ.

استانادا قازاقستان مەن ۆەتنام اراسىنداعى ديپلوماتيالىق قارىم-قاتىناستىڭ ورناعانىنا 30 جىل تولۋىنا وراي سالتاناتتى ءىس-شارا ءوتتى.

اتالعان شارا بارىسىندا ەكى ەل اراسىندا تىكەلەي اۋە رەيسىنىڭ رەسمي اشىلۋى ءوتتى.
وسى قازاننان باستاپ الماتىدان ۆەتنامنىڭ نياچانگ قالاسىنا العاشقى اۋە رەيسى ۇشادى.
ۇيىمداستىرۋشىلاردىڭ ايتۋىنشا، ۇشاق اپتاسىنا ەكى رەت قاتىنايدى جانە ۇشۋ ۋاقىتى 9 ساعاتتان اسادى.

«الدىمەن بارشا قوناققا قوش كەلدىڭىزدەر دەيمىن. بيىل قازاقستان مەن ۆەتنام مەملەكەتى اراسىندا رەسمي قارىم-قاتىناستىڭ ورناعانىنا 30 جىل تولىپ وتىر. بۇگىنگى شارا ۆەتنام سوسياليستىك رەسپۋبليكاسىنىڭ ۆيسە-پرەزيدەنتى ۆو تحي ان سۋان حانىمنىڭ قازاقستانعا ساپارى اياسىندا ۇيىمداستىرىلىپ وتىر»، - دەدى ق ر سىرتقى ىستەر ءمينيسترىنىڭ ورىنباسارى ءادىل تۇرسىنوۆ.

قازاقستان مەن ۆەتنام اراسىندا قاتىنايتىن «Vietjet» اۋە كومپانياسى ءبىزدىڭ ەلدەن بولەك ءۇندىستان، جاپونيا، كورەيا، ەۋروپا ەلدەرى جانە اۋستراليانى بايلانىستىرادى.

«تىكەلەي اۋە رەيسى قازاقستان جانە ورتالىق ازيا ەلدەرىن ۆەتناممەن بايلانىستىرىپ ەكونوميكا، ساۋدا جانە تۋريزم سالاسىنداعى بىرلەسكەن جوبالاردىڭ دامۋىنا ىقپال ەتەدى دەپ سانايمىن. Vietjet اۋە كومپانياسى ساياحاتتاۋشى، جۇمىس بابىمەن، وقۋ جانە باسقا دا سەبەپتەرپەن ۇشاتىن كليەنتتەردى تاماشا قىزمەتپەن قامتاماسىز ەتەدى»، - دەيدى «Vietjet» اۋە كومپانياسىنىڭ ۆيسە-پرەزيدەنتى، ديرەكتورلار كەڭەسىنىڭ مۇشەسى چۋ ۆەت كۋونگ.