قازاقستاندا ۆەيپكە تۇبەگەيلى تىيىم سالىنۋى مۇمكىن.
قازىرگى تاڭدا بۇكىل الەم ءۇشىن وزەكتى ماسەلە استانادا تالقىلاندى. بۇگىندە قازاقستان ۆەيپ كونترابانداسى بويىنشا دۇنيەجۇزىندە 5 ورىندا تۇر.
دارىگەرلەر ءتۇرلى-تۇستى قۇتىدان شىعاتىن ءتاتتى تۇتىنگە وقۋشىلار الدانىپ وتىر دەپ دابىل قاعۋدا، دەپ حابارلايدى Almaty-akshamy.kz.
ەل پرەزيدەندى قاسىم-جومارت توقايەۆ وسى ءقاۋىپتى ۇردىسپەن كۇرەسۋدى جاۋاپتىلارعا بەس اي بۇرىن تاپسىرعان. ءوز سوزىندە «ۆەيپ پەن ەسىرتكىنىڭ اراسى ءبىر-اق قادام» دەپ شەگەلەپ ايتقان. ال دۇنيەجۇزىلىك دەنساۋلىق ساقتاۋ ۇيىمىنىڭ قازاقستاندىق كەڭسە باسشىسى كاليان شەگەتىندەرگە دە قاتاڭ تۇردە شەكتەۋ قويۋ كەرەك دەيدى.
«وكىنىشكە قاراي، بۇكىل الەم بويىنشا كاليان تۇتىنۋ ارتىپ بارادى. كاليان قوعامدىق ورىنداردا، بولمەلەردە وتە ءجيى پايدالانىلادى. بۇل تەمەكى شەگۋدىڭ ءپاسسيۆتى ءتۇرىن ارتتىرادى. كاليان تارتىلعان بولمەدەگى اۋا تەمەكى شەگىلگەن ۇيدەگى اۋانىڭ ساپاسىمەن بىردەي. ول ءبارىبىر ۋلى. ءبىز بولاشاق ۇرپاقتى وسىنداي زياندى ونىمدەردەن قورعاۋىمىز قاجەت»، - دەدى ددس ۇيىمىنىڭ قازاقستانداعى كەڭسە باسشىسى سكەندەر سىلا.