ەلوردادا «وتان قورعاۋشىلار» مونۋمەنتى جانىندا تۇڭعىش پرەزيدەنت – ەلباسى اتىنداعى ۇلتتىق قورعانىس ۋنيۆەرسيتەتى وفيسەرلەرىنىڭ سالتاناتتى شىعارىلىمى بولدى، دەپ حابارلايدى Almaty-akshamy.kz Inform.kz-كە سىلتەمە جاساپ.
قازاقستان قارۋلى كۇشتەرى وفيسەرلىك كورپۋسىنىڭ قاتارىن 145 ماگيسترانت تولىقتىرسا، سونىڭ 22ء-سى بولاشاقتا ۇلتتىق ۇلاندا قىزمەت اتقارادى.
«بۇگىن قارۋلى كۇشتەر قاتارى قازاقستاننىڭ ەڭ بەدەلدى اسكەري وقۋ ورنىندا وقىعان كاسىبي دايىندالعان وفيسەرلەرمەن تولىقتى. وفيسەرلەر ستاندارتتان تىس شەشىمدەر قابىلدايتىن جوعارى بىلىكتى ماماندار عانا ەمەس، سونداي-اق كۇردەلى جاۋىنگەرلىك مىندەتتەردى ورىنداۋعا، باعىنىستىلاردى ەرتىپ، ولاردىڭ ءومىرىن ساقتاپ قالۋعا دايىن، انتىنا ادال پاتريوتتار بولۋعا ءتيىس»، - دەدى قورعانىس ءمينيسترى، گەنەرال-پولكوۆنيك رۋسلان جاقسىلىقوۆ تۇلەكتەرگە ارناعان سوزىندە.
قۇقىقتىق ءتارتىپ اسكەرلەرىنىڭ 22 اسكەري قىزمەتشىسى «ۇلتتىق ۇلانداعى مەنەدجمەنت» ءبىلىم بەرۋ باعدارلاماسى اياسىندا ءتورت بىلىكتىلىك بويىنشا وقىتۋدان ءوتتى: «ۇۇ جەدەل-تاكتيكالىق باسقارماسى»، «ازاماتتىق قورعانىستىڭ جەدەل-تاكتيكالىق باسقارماسى»، «ۇۇ تاربيە جانە يدەولوگيالىق جۇمىسىن ۇيىمداستىرۋ» جانە «ۇۇ تەحنيكالىق قامتاماسىز ەتۋدى باسقارۋ».
ايتا كەتەيىك، ۇلتتىق ۇلان فاكۋلتەتىنىڭ تۇلەگى، مايور ماقسات مۇقايەۆ وقۋ بارىسىندا وسى جوو-نىڭ بارلىق تۇلەكتەرىنىڭ اراسىندا ەڭ كوپ بالل جيناعان. الداعى ۋاقىتتا تۇلەكتەر العان بىلىمدەرىن ۇلتتىق ۇلاننىڭ اسكەري بولىمدەرى مەن وڭىرلىك قولباسشىلىقتارىندا ءىس جۇزىندە قولداناتىن بولادى.