ەلورداداعى قارۋلى كۇشتەردىڭ ۇلتتىق اسكەري-پاتريوتتىق ورتالىعىندا مەديسينا قىزمەتكەرلەرى كۇنىنە ارنالعان سالتاناتتى شارا ءوتتى، دەپ حابارلايدى Almaty-akshamy.kz Inform.kz-كە سىلتەمە جاساپ.
قورعانىس ءمينيسترىنىڭ ورىنباسارى گەنەرال-مايور مۇحامەدجان تالاسوۆ قارۋلى كۇشتەر باس اسكەري-مەديسينالىق باسقارماسى جانە اسكەري مەديسينالىق مەكەمەلەردىڭ جەكە قۇرامىمەن كەزدەستى. ول دارىگەرلەردى، ورتا جانە كىشى مەديسينالىق قىزمەتكەرلەردى، اسكەري-مەديسينالىق قىزمەت ارداگەرلەرىن كاسىبي مەرەكەمەن قۇتتىقتادى.
«ۇلت دەنساۋلىعى – ەلىمىزدەگى مەملەكەتتىك ساياساتتىڭ باستى باسىمدىقتارىنىڭ ءبىرى. ازاماتتاردىڭ دەنساۋلىعىنا قامقورلىق تانىتاتىن مامان يەلەرى قاي ۋاقىتتا بولماسىن قوعام اراسىندا قۇرمەتكە يە بولدى. سىزدەر كوروناۆيرۋس پاندەمياسى كەزىندە ناۋقاستاردىڭ ءومىرى مەن دەنساۋلىعى ءۇشىن ايانباي كۇرەستىڭىزدەر. بۇگىنگى كۇنى دە سىزدەر جوعارى جاۋاپكەرشىلىك پەن جۇمىستارىڭىزعا دەگەن ادالدىقتى تانىتىپ، كاسىبي پارىزدارىڭىزدى ابىرويمەن اتقارىپ كەلەسىزدەر»، - دەدى گەنەرال-مايور مۇحامەدجان تالاسوۆ.
سونىمەن قاتار، اسكەري-مەديسينالىق قىزمەتتىڭ وركەندەۋى مەن قالىپتاسۋىنا ەلەۋلى ۇلەس قوسقان وتاندىق اسكەري مەديسينا ارداگەرلەرىنە ەرەكشە ريزاشىلىعىن ءبىلدىردى. ولار قالىپتاستىرعان تاجىريبە مەن بىلىمدەگى داستۇرلەر قازىرگى ۋاقىتتا الدا تۇرعان اۋقىمدى مىندەتتەردى شەشۋگە سەپتىگىن تيگىزەتىنىن ايتتى. سالتاناتتى شارادا كوپ جىلعى جەمىستى ەڭبەگى جانە دەنساۋلىق ساقتاۋ جۇيەسىن جەتىلدىرۋگە قوسقان بەلسەندى ۇلەسى ءۇشىن ءبىرقاتار اسكەري مەديسينا قىزمەتكەرىنە مەدالدار، ەستەلىك بەلگىلەر، قۇرمەت گراموتالارى مەن العىس حاتتار تابىستالدى.