كەڭەستى پرەمەر-مينيستر باسقاراتىن بولادى.
سۋ ماسەلەسى بويىنشا وتەتىن مەملەكەتارالىق كەلىسسوزدەردە قازاقستاننىڭ مۇددەسىن تاباندى قورعاۋعا نەگىزدەلگەن سۋ كەڭەسى قۇرىلادى. ەكولوگيا، گەولوگيا جانە تابيعي رەسۋرستار مينيسترلىگى وسىنداي باستاما كوتەرىپ وتىر، دەپ حابارلايدى Almaty-akshamy.kz قازاقپاراتقا سىلتەمە جاساپ.
ۆيسە-مينيستر سەرىك قوجانيازوۆ ورتالىق كوممۋنيكاسيالار قىزمەتىندە وتكەن بريفينگتە اتالمىش كەڭەستى ق ر پرەمەر-مينيسترى باسقاراتىنىن ءمالىم ەتتى. ونىڭ ايتۋىنشا، ۆەدومستۆو سۋ رەسۋرستارى سالاسىنداعى احۋالدى جاقسارتۋ ءۇشىن بىرنەشە شارانى جوسپارلاپ وتىر.
«ءبىرىنشى، مەملەكەتارالىق ءوزارا قارىم-قاتىناستاردىڭ اسا ماڭىزدى ماسەلەلەرى بويىنشا شەشىمدەر ازىرلەۋ ءۇشىن كەلىسسوزدەر پروسەستەرىندەگى قازاقستاننىڭ ۇستانىمىن كۇشەيتۋ ءۇشىن ق ر پرەمەر-مينيسترىنىڭ باسشىلىعىمەن سۋ كەڭەسى قۇرىلماقشى. بۇل كەڭەستىڭ نەگىزگى مىندەتى سىرتقى سۋ ساياساتىن ازىرلەۋ بارىسىندا ۇكىمەتتىڭ بارلىق قۇرامىنىڭ ءىس-قيمىلىن ۇيلەستىرۋ بولادى»، - دەدى ءمينيستردىڭ ورىنباسارى.
سونداي-اق، مينيسترلىك سۋ رەسۋرستارى كوميتەتى مەن ونىڭ باسسەيندىك ينسپەكسيالارىن كۇشەيتۋگە جول اشپاقشى.
«سۋ رەسۋرستارىن باسقارۋدىڭ قولدانىستاعى جۇيەسى ءبىرىنشى كەزەكتە سۋ شارۋاشىلىعى قۇرىلىستارىن قايتا جاڭارتۋ جانە سالۋ جونىندەگى جوبالاردى ىسكە اسىرۋعا باعىتتالعان. سۋ رەسۋرستارىن ەسەپكە الۋ، سۋ ۇنەمدەۋ، تالداۋ جانە جاعدايدىڭ دامۋىن بولجاۋ سياقتى ماسەلەلەر ءتيىستى نازاردان تىس قالىپ كەلەدى. باسسەيندىك ينسپەكسيالاردى سۋ رەسۋرستارىن مەملەكەتتىك باسقارۋدىڭ نەگىزى رەتىندە قاراۋ قاجەت»، - دەدى ول.
ايتۋىنشا، ينسپەكتورعا تۇسەتىن جۇكتەمە تىم اۋىر.
«بۇگىندە باسسەيندىك ينسپەكسيانىڭ ءبىر قىزمەتكەرى 93 اۋىلدىق ەلدى مەكەن ورنالاسقان 41 مىڭ شارشى قاشىرىم اۋماققا قىزمەت كورسەتەدى. باسسەيندىك ينسپەكسيالاردى ماتەريالدىق-تەحنيكالىق قامتاماسىز ەتۋ دەڭگەيى وزەكتى بولىپ تابىلادى»، - دەدى سەرىك قوجانيازوۆ.