اقتاۋداعى العاشقى كولىك ساۋدا-ەكسپورتتىق فورۋم اياسىندا قازاقستان، تۇرىكمەنستان جانە اۋعانستان وكىلدەرىنىڭ ءۇشجاقتى كەزدەسۋى ءوتتى.
تاراپتار تۇرىكمەنستاننىڭ باتىس شەكاراسىنان اۋعانستان ارقىلى پاكىستانعا جانە ودان ءارى ءۇندىستانعا وتەتىن تۋرگۋندي – گەرات – كانداگار – سپين – بۋلداك جاڭا تەمىرجول ماگيسترالىن سالۋ مۇمكىندىكتەرىن تالقىلادى، دەپ حابارلايدى almaty-akshamy.kz.
ۇكىمەتتىڭ رەسمي سايتىندا جاريالانعان مالىمەتكە سۇيەنسەك، بۇل جوبانى جۇزەگە اسىرۋعا تۇرىكمەنستان مينيسترلەر كابينەتى جانىنداعى كولىك جانە كوممۋنيكاسيالار اگەنتتىگىنىڭ باسشىسى ماممەتحان چاكىيەۆ بىرلەسىپ قاتىسۋدى ۇسىنعان. ونىڭ ايتۋىنشا، تۇرىكمەن تاراپى اۋعانستاندىق ارىپتەستەرىمەن تۋرگۋنديدا لوگيستيكالىق ورتالىق قۇرۋعا كەلىسكەن جانە جاقىن ارادا قۇرىلىسقا كىرىسۋگە نيەتتى.
استىقتى، كونتەينەرلەردى جانە باسقا دا جۇكتەردى اۋىستىرىپ تيەۋ ءۇشىن نىساندار سالۋ جوسپارلانۋدا. جوبا ىسكە قوسىلعاننان كەيىن لوگيستيكالىق ورتالىق تۋرگۋندي تاراپىنان جۇك اينالىمىنىڭ ارتۋىنا سەرپىن بەرەدى دەپ كۇتىلۋدە.
«ءبىز قازاقستاندىق تاراپتى قۇرىلىسقا قاتىسۋعا شاقىرامىز. سىزدەردە جوعارى تەمىرجول توسەمىنىڭ ساپالى ءوندىرىسى بار ەكەنى بەلگىلى. باسقا دا كوپتەگەن مۇمكىندىك بار. تۋرگۋندي – گەرات بۇل تەك تەمىرجول قۇرىلىسى ەمەس، سونىمەن قاتار جۇك اعىنىن ودان ءارى دامىتۋ، وسى باعىت بويىنشا جۇكتەردى تارتۋ. قازاقستاندىق تاراپتىڭ قاتىسۋىمەن ءبىز وسى ءدالىزدىڭ تارتىمدىلىعىن بىرنەشە ەسە ارتتىرا الامىز»، — دەپ اتاپ ءوتتى ماممەتحان چاكىيەۆ.
اۋعان تاراپىنىڭ وكىلدەرى قازاقستان مەن تۇرىكمەنستان ارقىلى پاكىستانعا جۇكتەردىڭ ءترانزيتىن قامتاماسىز ەتۋگە دايىن ەكەندىكتەرىن ءبىلدىردى. ولار تاسىمالداۋ پروسەسىنىڭ بارلىق قاتىسۋشىسى ءۇشىن وسى ءدالىزدى دامىتۋدىڭ تيىمدىلىگىن اتاپ ءوتىپ، قازاقستان مەن تۇرىكمەنستان اۋماقتارى ارقىلى جۇڭگو تاۋارلارىن يمپورتتاۋعا قىزىعۋشىلىق ءبىلدىردى.
«ءبىز جاڭا تەمىرجول باعىتىن بىرلەسىپ جۇزەگە اسىرۋ تۋرالى ۇسىنىستاردى قۇپتاپ، تۇرىكمەنستان مەن اۋعانستاننىڭ تۋرگۋندي – گەرات جولىن سالۋ جوسپارى بار ەكەنىن ەستىگەنىمىزگە قۋانىشتىمىز. جوبا تاراپتارىنىڭ كۇش بىرىكتىرۋى وتە ماڭىزدى. ءبىز تۇرىكمەنستان يدەياسىن قولدايمىز، بۇل ءىس جۇزىندە اۋعانستان ارقىلى پاكىستانعا جانە ودان ءارى ءۇندىستانعا باتىس ءدالىز قۇرىلىسىنىڭ باستالۋى»، — دەپ اتاپ ءوتتى سەرىك جۇمانعارين.
سونىمەن قاتار قازاقستان ۆيسە-پرەمەرى يران دەلەگاسياسىمەن كەزدەسۋ وتكىزىپ، وندا كولىك جانە لوگيستيكا ينفراقۇرىلىمىن دامىتۋ جونىندەگى بىرلەسكەن نيەتتەردى ىسكە اسىرۋ بارىسى تالقىلاندى.