قۇجاتتار ءتىزىمى ەكى ەسە قىسقاردى.
بۇگىن ق ر يندۋستريا جانە ينفراقۇرىلىمدىق دامۋ ءمينيسترىنىڭ №432 بۇيرىعىنا وزگەرىستەر كۇشىنە ەندى. وندا ءبىرىڭعاي وپەراتور – «قازاقستان تۇرعىن ءۇي كومپانياسى» اق كەپىلدىگىن الۋ ءۇشىن قۇجاتتار 2 ەسە قىسقارتىلدى، دەپ حابارلايدى Almaty-akshamy.kz.
«ءبىز بيزنەسپەن ءبىرقاتار كەزدەسۋلەر وتكىزدىك، ارتىق تالاپتاردى الىپ تاستادىق، قاراپايىم جانە اشىق راسىمدەردى ەنگىزىپ جاتىرمىز. ازىرلەۋشىلەر ءوز وتىنىمدەرىن پورتال ارقىلى تۇراقتى نەگىزدە ونلاين تاپسىرا الادى جانە جەكە كابينەتتەر ارقىلى ستاتۋستارىن باقىلاپ وتىرۋعا بولادى. بارلىق كەزەڭدەردە سيفرلىق ءىز قالادى».
«بيىل ءبىز 1 ترلن. تەڭگە مەجەسىنەن وتەمىز. شاعىن جانە ورتا كومپانيالار، اسىرەسە وڭىرلەردەگى كومپانيالار ءبىزدىڭ كەپىلدىگىمىزدى الۋ مۇمكىندىگىنە يە بولۋى ءۇشىن زاڭنامالىق تالاپتاردى تومەندەتۋ بويىنشا جۇمىس ىستەۋدەمىز. ەگەر جوبا بويىنشا دەفولت ورىن السا، وندا قتك ءوز قاراجاتى ەسەبىنەن تۇرعىن ءۇيدىڭ قۇرىلىسىن اياقتايدى جانە ونى ۇلەسكەرلەرگە بەرەدى، ازاماتتاردىڭ قاراجاتىنىڭ 100% ساقتالۋى قامتاماسىز ەتىلەدى»، - دەپ ءتۇسىندىردى ءتوراعا ورىنباسارى ولجاس سالىقوۆ.
كەپىلدىك بەرۋ تەتىگى ارقىلى بارلىعى 862 ملرد. تەڭگەگە 178 جوبا ماقۇلداندى. بۇل ەلدەگى 53 مىڭ ۇلەسكەردىڭ سالىمدارىن قورعاۋعا مۇمكىندىك بەردى.