«قازاقستان تەمىر جولى» ۇلتتىق كومپانياسى تەمىرجول سالاسىندا جاساندى ينتەللەكتىنى تەستىلەۋ، اپروباسيالاۋ جانە ەڭ ۇزدىك ازىرلەمەلەردى ەنگىزۋ ماقساتىندا سيفرلىق پوليگوندار قۇرۋدى باستايدى. بۇل تۋرالى Digital Almaty 2025 حالىقارالىق فورۋمىندا بەلگىلى بولدى، دەپ حابارلايدى aqshamnews.kz.
IDC ۆيسە-پرەزيدەنتى اندرەي بەكلەميشيەۆ «AI بويىنشا جاھاندىق كواليسيا: سەرىكتەستىك پەن دامۋ ۆەكتورى» سەسسياسىندا جاساندى ينتەللەكت نارىعىنداعى جاھاندىق ترەندتەرمەن ءبولىستى. IDC دەرەكتەرى بويىنشا، جاساندى ينتەللەكت تەحنولوگيالارىنا جاھاندىق شىعىندار جىل سايىن ورتا ەسەپپەن 30%-دان استام ءوسىپ كەلەدى، ال GenAI نارىعى وتكەن جىلى ەكى ەسەدەن كوپ ۇلعايعان. كومپانيا ساراپشىلارى 2028 جىلعا قاراي جاساندى ينتەللەكت تەحنولوگيالارىنا جالپى شىعىندار 620 ميلليارد اقش دوللارىنان اساتىندىعىن بولجاپ وتىر.
اندرەي بەكلەميشيەۆ قازاقستاندا جاساندى ينتەللەكتىنىڭ ءساتتى قولدانىلۋى تۋرالى بىرنەشە مىسال كەلتىرىپ، «قازاقستان تەمىر جولى» كومپانياسىنىڭ سيفرلىق پوليگوندار قۇرۋ جونىندەگى باستاماسىن اتاپ ءوتتى.