ءىىم كوشى-قون قىزمەتى قازاقستان تاراپىنان قابىلداۋشى تۇلعالار شەتەلدىكتىڭ كەلگەنى تۋرالى حابارلاۋعا مىندەتتى ەكەنىن ەسكە سالدى، دەپ حابارلايدى Almaty-akshamy.kz Polisia.kz-كە سىلتەمە جاساپ.
“قۇرمەتتى قازاقستاندىقتار! قوناق ۇيلەردىڭ، حوستەلدەردىڭ، پانسيوناتتاردىڭ، جاتاقحانالاردىڭ يەلەرى! پاتەرلەر مەن باسقا دا تۇرعىن ءۇي-جايلاردىڭ يەلەرى، سىزدەرگە ءسوز ارنايمىن! قازاقستان رەسپۋبليكاسىنىڭ ىشكى ىستەر مينيستىرلىگى كوشى-قون زاڭناماسىنىڭ تالاپتارىن قاتاڭ ساقتاۋعا شاقىرادى. “كوشىپ كەلۋشىلەردىڭ قازاقستان رەسپۋبليكاسىنا كەلۋى مەن وندا بولۋى قاعيدالارىنىڭ” 9-تارماعىنا سايكەس، شەتەلدىك ازاماتتاردى قابىلدايتىن جەكە جانە زاڭدى تۇلعالار وزدەرىنە كەلەتىن كوشىپ كەلۋشىلەر تۋرالى ىشكى ىستەر ورگاندارىن حاباردار ەتۋگە مىندەتتى ەكەنىن تۇسىندىرەمىز. اتالعان حابارلاما شەتەلدىك ازامات كەلگەن كۇننەن باستاپ ءۇش جۇمىس كۇنى ىشىندە مىندەتتى تۇردە بەرىلەدى. وسى مەرزىمدى وتكىزىپ العان جانە كوشىپ كەلۋشىنىڭ كەلۋى تۋرالى ىشكى ىستەر ورگاندارىنا حابارلاماعان جاعدايدا، قازاقستاندا قابىلداۋشى جەكە جانە زاڭدى تۇلعا قازاقستان رەسپۋبليكاسى اكىمشىلىك قۇقىقبۇزۋشىلىق تۋرالى كودەكسىنىڭ 518-بابى بويىنشا جاۋاپتىلىققا تارتىلاتىنىن ەسكەرتەمىز. زاڭدى تۇلعالار ءۇشىن 10-نان 25 ايلىق ەسەپتىك كورسەتكىشكە دەيىن، ال قايتالانعان جاعدايدا 100 ايلىق ەسەپتىك كورسەتكىشكە دەيىن ايىپپۇل قاراستىرىلعان، بۇل 306 مىڭ تەڭگەگە تەڭ. جەكە تۇلعالار ءۇشىن ەسكەرتۋ تۇرىندەگى جازا، ال قايتالاپ بۇزعانى ءۇشىن 30 ايلىق ەسەپتىك كورسەتكىش نەمەسە 91 890 تەڭگە مولشەرىندە ايىپپۇل كوزدەلگەن. شەتەلدىكتىڭ كەلۋى تۋرالى حابارلامانى قابىلداۋشى تاراپ ءۇش تاسىلمەن بەرە الاتىنىن حابارلايمىز. ءبىرىنشى. جەكە جانە زاڭدى تۇلعالار كوشىپ كەلۋشىنىڭ كەلگەنى تۋرالى ەلەكتروندىق ۆيزالىق جانە كوشى-قون پورتالى ارقىلى تىكەلەي حابارلاي الادى: vmp.gov.kz نەمەسە egov.kz. ول ءۇشىن قازاقستاندىق تاراپقا كوشىپ كەلۋشىنىڭ ەلەكتروندىق سيفرلىق قولتاڭباسى جانە پاسپورتتىق دەرەكتەرى جەتكىلىكتى. ەكىنشى ءادىس. قازاقستان تاراپىنان قابىلداۋشى جەكە جانە زاڭدى تۇلعالار شەتەلدىكتىڭ كەلگەنى تۋرالى حابارلامانى تىكەلەي ءوز اۋدانى بويىنشا ىشكى ىستەر ورگاندارىنىڭ كوشى-قون قىزمەتىنىڭ بولىمدەرى مەن بولىمشەلەرىنە بەرە الادى. ءۇشىنشى وڭاي ءادىس – Apر Store نەمەسە Play Market-تەن e-Qonaq قوسىمشاسىن جۇكتەۋ. حابارلاما ەكى قاداممەن بەرىلەدى. ءتىپتى، سمارتفوننىڭ كامەراسىنىڭ كومەگىمەن ءتولقۇجاتىن سكانەرلەۋ ارقىلى شەتەلدىكتىڭ ءتولقۇجات دەرەكتەرىن جۇكتەۋ مۇمكىندىگى بار. حابارلامانى اۆتوريزاسيالاۋ جانە تولتىرۋ ءينتۋيتيۆتى. ءبىر مينۋت ۋاقىت الادى. جەكە جانە زاڭدى تۇلعالار زاڭنىڭ وسى تالاپتارىن ساقتاۋعا مىندەتتى ەكەنىنە تاعى دا نازار اۋدارامىز. شەتەلدىك قوناقتار وزدەرىنىڭ پاسپورتتىق دەرەكتەرىن قابىلداۋشى تاراپقا حابارلاۋى جانە قازاقستان رەسپۋبليكاسىنىڭ زاڭناماسىن ساقتاۋى ءتيىس”، – دەدى ءىىم كوشى-قون قىزمەتى كوميتەتى ءتوراعاسىنىڭ م.ا. اسلان اتالىقوۆ.