وتاندىق تانكيستەر كاسىبي شەبەرلىكتەرىن ۇدايى ارتتىرىپ وتىرادى.
15 قىركۇيەكتە قازاقستان قارۋلى كۇشتەرىندە تانكيستەر كۇنى اتاپ وتىلەدى، دەپ حابارلايدى Almaty-akshamy.kz.
«بۇل كۇننىڭ تاريحى 1942 جىلدان باستالادى. سول ءبىر قاھارلى سوعىس جىلدارى رەسپۋبليكا جاستارى جيناعان قاراجاتقا جاسالعان تانكتەر لەگى قازاقستاننان مايدان دالاسىنا جىبەرىلگەن بولاتىن»،- دەلىنگەن قورعانىس مينيسترلىگىنىڭ باسپا ءسوز قىزمەتىنىڭ حابارلاماسىندا.
1941 جىلى شىمكەنت تەمىرجولىنىڭ ەڭبەكشىل جاستارىنىڭ باستاماسىمەن بۇكىل رەسپۋبليكا بويىنشا ءبىر جىل ىشىندە تانك لەگىن قۇرۋعا جەتەتىن اقشالاي قاراجات جينالدى. 1942 جىلعى 15 قىركۇيەكتە «قازاقستان كومسومولى» دەگەن جازۋى بار 46 تانك اسكەرلەرگە بەرىلدى. بۇل جاۋىنگەرلىك ماشينالار ۇلى وتان سوعىسىنىڭ شايقاستارىنا قاتىستى. كەيبىر كۋاگەرلەردىڭ ەستەلىگىنە سۇيەنسەك، بەرلين تۇبىندەگى شايقاستارعا دا قازاقستاندا جاسالعان بىرنەشە تانك قاتىسقان.
بۇگىنگى تاڭدا سوعىس تاكتيكاسىنداعى ايتارلىقتاي وزگەرىستەرگە جانە قارۋ-جاراقتىڭ جاڭا تۇرلەرىنىڭ پايدا بولۋىنا قاراماستان، تانكتەر الەمنىڭ كوپتەگەن دامىعان ەلدەرى ارميالارىنىڭ نەگىزگى جاۋىنگەرلىك قۇرامداس بولىگى بولىپ قالا بەرەدى. سەنىمدى ساۋىتى، جوعارى مانيەۆرلىك جانە اتىس قۋاتىنىڭ ارقاسىندا تانكتەر جەردەگى ۇرىس كەزىندە كەڭىنەن قولدانىلىپ كەلەدى.
وتاندىق تانكيستەر جاۋىنگەرلىك ازىرلىگى مەن قابىلەتىن ارتتىرۋ ءۇشىن ۇنەمى كاسىبي شەبەرلىگىن جەتىلدىرۋ، جاڭا تاكتيكالىق تاسىلدەردى ەنگىزۋ بويىنشا جۇمىس ىستەۋدە. قازىرگى زامانعى قارۋلى قاقتىعىستاردىڭ تاجىريبەسىنە سۇيەنە وتىرىپ، قازاقستان اسكەرى دە قارسىلاسقا تويتارىس بەرۋگە جانە شىعىنداردى ازايتۋعا مۇمكىندىك بەرەتىن «تانك كارۋسەلى» جانە «ساق قورعانى» جاۋىنگەرلىك ماشينالارىن قولدانۋ تاسىلدەرى ءساتتى سىنالدى.
تانك بولىمشەلەرىنىڭ تاپسىرمالاردى ساپالى ورىنداۋى كوبىنەسە ەكيپاجداردىڭ شەبەر جانە ۇيلەسىمدى ارەكەتتەرىنە بايلانىستى. سول سەبەپتى تانكيستەردى دايىنداۋعا كوپ كوڭىل بولىنەدى. وفيسەر كادرلاردىڭ باستى ۇستاحاناسى – الماتىداعى قۇرلىق اسكەرلەرىنىڭ اسكەري ينستيتۋتى. ال تانك اسكەرلەرىنىڭ كىشى ماماندارىن وقىتۋ گۆاردەيسك گارنيزونىنداعى وقۋ-جاتتىعۋ ورتالىعىندا جۇزەگە اسىرىلادى.
جاۋىنگەرلىك ءداستۇردى جالعاستىرۋشى قازاقستاندىق تانكيستەر كاسىبي مەرەكەلەرى قارساڭىندا چەللەندج ۇيىمداستىرىپ، ونى قارۋلى كۇشتەردەگى ارىپتەستەرى تۇگەل قولدادى. ەل قاۋىپسىزدىگىنىڭ سەنىمدى قالقانى بولعان جاۋىنگەر-تانكيستەر وقۋ-جاۋىنگەرلىك تاپسىرمالاردى تولىق ورىنداپ، كاسىبي شەبەرلىكتەرىن ۇدايى ارتتىرىپ وتىرادى.