2020 جىلى 213 ەلدىڭ ىشىندە تابيعي گاز 144 مەملەكەتتىڭ تۇرعىندارىنا قولجەتىمدى بولعان.
قازاقستاندا كوشەدەگى گاز جەلىسىنىڭ ۇزىندىعى 34،8 مىڭ شاقىرىمدى قۇرادى، بۇل وتكەن جىلمەن سالىستىرعاندا 6،6%-عا ارتىق، دەپ حابارلايدى Almaty-akshamy.kz Inbusiness.kz سىلتەمە جاساپ.
ءبىر جىل ىشىندە 2،3 مىڭ شاقىرىم جەلى قوسىلدى. قازىرگى ۋاقىتتا 74،1 شاقىرىم جەلى جوندەۋدى قاجەت ەتەدى.
2010 جىلدان 2021 جىلعا دەيىن مەملەكەتتىك بيۋدجەت ەسەبىنەن 1،3 مىڭنان استام گازداندىرۋ جوباسى ىسكە اسىرىلدى، وڭىرلەردە 18 مىڭ شاقىرىمنان استام گاز تاراتۋ جەلىلەرى سالىندى. اتاپ ايتقاندا، 2019 جىلدىڭ جەلتوقسانىندا ۇزىندىعى 1،06 مىڭ شاقىرىم بولاتىن "قىزىلوردا-استانا" باعىتى بويىنشا "سارىارقا" ماگيسترالدىق گاز قۇبىرىنىڭ قۇرىلىسى اياقتالىپ، ءبىرىنشى كەزەڭى پايدالانۋعا بەرىلدى.
ق ر گاز سالاسىن دامىتۋدىڭ 2022-2026 جىلدارعا ارنالعان كەشەندى جوسپارىنىڭ دەرەكتەرى بويىنشا، 2022 جىلعى 1 قاڭتارعا ەل حالقىنىڭ گازداندىرۋ دەڭگەيى 53،1%-عا جەتتى، تابيعي گازعا 9،8 ملن ادام قول جەتكىزدى.
گازداندىرۋ دەڭگەيىنىڭ ءوسۋىن جانە جاڭا تۇتىنۋشىلاردىڭ قوسىلۋىن ەسكەرە وتىرىپ، 2010-2021 جىلدارى ىشكى نارىقتا گاز تۇتىنۋ كولەمى 106%-عا، ياعني 9 ملرد-تان 18،6 ملرد تەكشە مەترگە دەيىن ءوستى.
IndexMundi مالىمەتتەرىنە سايكەس، 2020 جىلى 213 ەلدىڭ ىشىندە تابيعي گاز 144 مەملەكەتتىڭ تۇرعىندارىنا قولجەتىمدى بولعان. ولاردىڭ ىشىندە قازاقستان تۇتىنىلاتىن گازدىڭ جالپى كولەمى بويىنشا 43-ورىندا (جىلىنا 15،4 ملرد تەكشە مەتر) جانە جان باسىنا شاققاندا تۇتىنىلاتىن گاز كولەمى بويىنشا 41-ورىندا (جىلىنا 805،1 تەكشە مەتر) بولدى. ەلىمىزدە جان باسىنا شاققانداعى گاز تۇتىنۋ كولەمى ارمەنيا، مولدوۆا، ۋكراينا، قىرعىزستان مەن تاجىكستان سياقتى تمد ەلدەرىنىڭ تۇرعىندارىنان كوبىرەك.