ولار قازاقستاندا رەسمي تۇردە تىركەلۋگە مىندەتتى بولادى.
ماينينگ پەن كريپتوبيرجالارعا قاتىستى زاڭ جوباسى ماقۇلداندى، دەپ حابارلايدى Almaty-akshamy.kz
ءماجىلىس دەپۋتاتتارى زاڭ جوباسىن ءبىرىنشى وقىلىمدا ماقۇلدادى. دەپۋتات ەكاتەرينا سمىشليايەۆانىڭ ايتۋىنشا، ماينەرلەرگە ليسەنزيا بەرۋ ءتارتىبى ەنگىزىلەدى.
«بۇل دەگەنىمىز، ماينەرلەر زاڭدى تۇلعا رەتىندە تىركەلىپ، سالىق سالىناتىن سۋبەكتىگە اينالادى. ماينينگ-پۋلدار دا ەكونوميكانىڭ ءبىر بولىگى بولادى»، - دەدى سمىشليايەۆا.
ليسەنزيانى سيفرلىق دامۋ مينيسترلىگى بەرەدى دەگەن جوسپار بار. ال كريپتوبيرجالار حالىقارالىق قارجى ورتالىعىندا ورنالاسادى. ءبىراق قازاقستاندا كريپتوۆاليۋتامەن تولەم جاساۋعا تىيىم سالىنعان. كريپتوبيرجالار قارجى ورتالىعىنىڭ اياسىندا عانا جۇمىس ىستەيدى. ال ماينەرلەر تابىستىڭ 75 پايىزىن وتاندىق كريپتوبيرجالاردا ايىرباستاۋعا مىندەتتەلەدى. بۇل تالاپ 2024 جىلدان باستاپ ەنگىزىلەدى.
قولدانىستاعى سالىقتان بولەك ماينەرلەردىڭ سىياقىسىنا قوسارلانعان قۇن سالىعى، ماينينگ پۋلدىڭ تابىس سالىعى، سونداي-اق كريپتوبيرجاداعى وپەراسيالار ءۇشىن تولەم الىنادى.