قازاقستان رەسپۋبليكاسى پرەمەر-مينيسترىنىڭ ورىنباسارى – سىرتقى ىستەر ءمينيسترى مۇرات نۇرتىلەۋ بەلگرادقا رەسمي ساپارى بارىسىندا سەربيا رەسپۋبليكاسىنىڭ پرەزيدەنتى الەكساندر ءۆۋچيچتىڭ قابىلداۋىندا بولدى.
كەزدەسۋ بارىسىندا سەربيا مەملەكەتىنىڭ باسشىسى ا. ۆۋچيچ ەكىجاقتى ءوزارا ءىس-قيمىلدىڭ جوعارى دەڭگەيىن، اسا جوعارى جانە جوعارى دەڭگەيلەردە ورنىقتى ساياسي ديالوگتى دامىتۋدى، سونداي-اق ەكى ەلدىڭ ەكىجاقتى فورماتتا دا، حالىقارالىق قۇرىلىمدار شەڭبەرىندە دە ءتيىمدى ءوزارا ءىس-قيمىلىن قاناعاتتانۋشىلىقپەن اتاپ ءوتتى، دەپ حابارلايدى Almaty-akshamy.kz.
ق ر ءسىم باسشىسى م. نۇرتىلەۋ سەربيا پرەزيدەنتىنە قازاقستان پرەزيدەنتى قاسىم-جومارت توقايەۆتىڭ ىزگى تىلەكتەرى مەن جىلى لەبىزدەرىن جەتكىزىپ، مەملەكەت باسشىسىنىڭ كەلەسى جىلى استاناعا ساپارمەن كەلۋگە شاقىرعانىن ايتتى.
قازاقستاندىق ديپلومات سۇحباتتاسىن ءوزىنىڭ سەرب ارىپتەسىمەن وتكەن كەلىسسوزدەر جونىندە، ونىڭ بارىسىندا جان-جاقتى بايلانىستاردى جانداندىرۋ بويىنشا ۋاعدالاستىقتارعا قول جەتكىزىلگەنى تۋرالى حاباردار ەتتى.
«استانا مەن بەلگرادتىڭ ورتاق مۇددەلەرگە نەگىزدەلگەن سەنىمدى قارىم-قاتىناستارمەن ماقتانۋعا تولىق نەگىز بار»، – دەدى م. نۇرتىلەۋ.
سۇحباتتاستار ەكى ەلدىڭ اسكەري-تەحنيكالىق سالادا، اۋىل شارۋاشىلىعى، كولىك جانە لوگيستيكا، تۋريزم، ءبىلىم بەرۋ جانە مادەنيەت سالالارىندا ىنتىماقتاستىق پەرسپەكتيۆالارىنىڭ بار ەكەنىن اتاپ ءوتتى.
كەزدەسۋ بارىسىندا سونداي-اق جاھاندىق جانە وڭىرلىك قاۋىپسىزدىكتىڭ وزەكتى ماسەلەلەرى تۋرالى پىكىر الماسۋ ءوتتى.