انتيكور قازاقستانداعى سپورت سالاسىنداعى سىبايلاس جەمقورلىقتى تەرگەۋ بويىنشا ماڭىزدى اقپارات جاريالادى، دەپ حابارلايدى aqshamnews.kz.
«سپورتتى دامىتۋ ديرەكسياسى» رەسپۋبليكالىق مەملەكەتتىك كاسىپورىن ديرەكتورى مەن ونىڭ ورىنباسارىنىڭ ارەكەتتەرى بويىنشا تەرگەۋ اياقتالدى. بۇل قۇرىلىم قازاقستاننىڭ سپورت جانە تۋريزم مينيسترلىگى جانىنداعى سپورت ىستەرى كوميتەتىنە باعىنادى.
انتيكور مالىمەتى بويىنشا، اتالعان لاۋازىمدى تۇلعالار كاسىپكەرلەرمەن بىرگە سپورتتىق جابدىق ساتىپ الۋعا بولىنگەن 584 ميلليون تەڭگەنى ۇرلاعان. سونىمەن قاتار، ولار تۋروپەراتورلارمەن كەلىسىمشارتتار جاساپ، باعالاردى اسىرا كورسەتكەن.
بۇدان بولەك، 2021 جىلى "سپورتتى دامىتۋ ديرەكسياسى" رەسپۋبليكالىق مەملەكەتتىك كاسىپورىن ديرەكتورى جەكە كومپانيانىڭ باسشىسى بولىپ جۇرگەن كەزدە، باتىس قازاقستان وبلىسىنداعى فۋتبول مەن حوككەيدىڭ دامۋىنا بولىنگەن 161،9 ميلليون تەڭگە بيۋدجەت قاراجاتىن جىمقىرعان.
انتيكور اتالعان تۇلعالاردىڭ اتىن اتاماسا دا، ولاردىڭ ەسىمدەرىن انىقتاۋ قيىن ەمەس. 2024 جىلدىڭ اقپانىندا "سپورتتى دامىتۋ ديرەكسياسى" رەسپۋبليكالىق مەملەكەتتىك كاسىپورىن ديرەكتورىنىڭ ورىنباسارى سەرجان جۇمابەكوۆ (2022 جىلعى ازيا ويىندارىنا ارنالعان "ءبىر رەتتىك فورما" بويىنشا قىلمىستىق ءىس بويىنشا ۇستالعان) جانە بۇرىنعى ديرەكتور ورالباي جاقسىمبەتوۆ (باتىس قازاقستان وبلىسىنىڭ سپورت باسقارماسىنىڭ بۇرىنعى باسشىسى) قاماۋعا الىندى.
وتكەن اقپان ايى قازاقستاننىڭ سپورت سالاسىنداعى جەمقورلىققا قاتىستى ۇستالعانداردىڭ سانى بويىنشا رەكوردتىق اي بولدى. سونىمەن قاتار ۇستالعاندار قاتارىندا:
▪️ داستانبەك قوسپانوۆ — اتىراۋ وبلىسىنىڭ سپورت باسقارماسىنىڭ بۇرىنعى باسشىسى
▪️ ەرلان قوجاعاپانوۆ — ق ر مادەنيەت جانە سپورت ءمينيسترىنىڭ بۇرىنعى ورىنباسارى، قازاقستان فۋتبول فەدەراسياسىنىڭ ەكس-پرەزيدەنتى
▪️ سامات ەرعالييەۆ — ق ر مادەنيەت جانە سپورت مينيسترلىگىنىڭ سپورت ىستەرى كوميتەتىنىڭ بۇرىنعى ءتوراعاسى