قىتايدىڭ چەندۋ قالاسىندا وتەتىن دۇنيەجۇزىلىك ستۋدەنتتىك ويىندارىنا قاتىساتىن قازاقستان سپورتشىلارىنىڭ جارىس كەستەسى شىقتى، دەپ حابارلايدى Almaty-akshamy.kz.
ق ر عىلىم جانە جوعارى ءبىلىم مينيسترلىگىنىڭ باسپا ءسوز قىزمەتى ءمالىم ەتكەندەي ۋنيۆەرسيتەت سپورتشىلارىنىڭ حالىقارالىق فەدەراسياسىنىڭ (FISU) XXXI دۇنيەجۇزىلىك ستۋدەنتتىك ويىندارى قىتايدىڭ وڭتۇستىك-باتىسىنداعى سىچۋان پروۆينسياسىنىڭ چەندۋ قالاسىندا 28 شىلدە مەن 8 تامىز ارالىعىندا وتەدى.
قازاقستان اتىنان 11 سپورت تۇرىنەن 93 سپورتشى قاتىسادى (ساداق اتۋ؛ وق اتۋ؛ جەڭىل اتلەتيكا؛ سپورتتىق گيمناستيكا؛ دزيۋدو؛ كوركەم گيمناستيكا؛ ۇستەل تەننيسى؛ تاەكۆوندو؛ ۋ-شۋ؛ ءجۇزۋ؛ سەمسەرلەسۋ). ەل قۇراماسى ەلىمىزدىڭ 26 جوعارى وقۋ ورنىنىڭ ستۋدەنتتەرىنەن جاساقتالعان.
28 شىلدەدە ۋنيۆەرسيادانىڭ اشىلۋ سالتاناتى وتەدى، ال 27 شىلدەدە قازاقستاندىقتار ساداق اتۋدان العاشقى جارىستاردا ونەر كورسەتەدى.
جارىس 8 تامىزعا دەيىن جالعاسادى، وندا 18 سپورت تۇرىنەن 269 مەدال جيىنتىعى وينالادى. الەمنىڭ تۇكپىر-تۇكپىرىنەن ون مىڭنان استام سپورتشى ماراپاتتار ءۇشىن كۇرەسەدى.
ۋنيۆەرسيادا جارىستارى «ارماندار چەندۋدە شىندىققا اينالادى» ۇرانىمەن وتەدى. ۋنيۆەرسيادانىڭ بويتۇمارى 2019 جىلدىڭ 30 جەلتوقسانىندا تانىستىرىلعان «Ronq Bao» پانداسى بولدى.
ەستەرىڭىزگە سالا كەتەيىك، 27 شىلدەدە ساعات 20:00-دە (چەندۋ قالاسىنىڭ ۋاقىتى بويىنشا) سپورت قالاشىعىندا مەملەكەتتىك تۋدى كوتەرۋ ءراسىمى وتەدى.
بۇعان دەيىن حابارلاعانىمىزداي، دۇنيەجۇزىلىك جازعى ۋنيۆەرسيادانىڭ اشىلۋ سالتاناتىندا قازاقستان تۋىن دزيۋدوشى قابلان نۇرسۇلتان كوتەرىپ شىعادى.
