قازاقستان رەسپۋبليكاسى پرەمەر-مينيسترىنىڭ ورىنباسارى – سىرتقى ىستەر ءمينيسترى مۇرات نۇرتىلەۋ قازاقستانداعى ديپلوماتيالىق ميسسياسىنىڭ اياقتالۋىنا بايلانىستى وزبەكستان رەسپۋبليكاسىنىڭ ەلشىسى سايديكرام نيازحودجايەۆتى قابىلدادى.
كەزدەسۋ بارىسىندا مينيستر مەملەكەت باسشىلارىنىڭ ساياسي ەرىك-جىگەرىنىڭ ارقاسىندا قازاق-وزبەك قاتىناستارى سوڭعى جىلدارى ستراتەگيالىق سەرىكتەستىك پەن وداقتاستىق دەڭگەيىنە كوتەرىلگەنىن اتاپ ءوتتى، دەپ حابارلايدى aqshamnews.kz سىرتقى ىستەر مينيسترلىگىنە سىلتەمە جاساپ.
وسىعان بايلانىستى وزبەكستان پرەزيدەنتى شاۆكات ميرزيويەۆتىڭ ءۇ.ج. 7-8 تامىزدا استاناعا جاساعان اۋقىمى مەن مازمۇنى بويىنشا تاريحي مەملەكەتتىك ساپارىنىڭ قورىتىندىسى كوپسالالى ەكىجاقتى ىنتىماقتاستىقتى ودان ءارى دامىتۋ ءۇشىن جوعارى پراكتيكالىق ماڭىزعا يە.
پرەزيدەنت جارلىعىنا سايكەس مينيستر ەلشىنىڭ ەكىجاقتى قاتىناستاردى نىعايتۋ بويىنشا اتقارعان ۇلكەن جۇمىسى جانە قوسقان ەلەۋلى ۇلەسىن اتاپ ءوتىپ، ەلشىگە II دارەجەلى «دوستىق» جوعارى مەملەكەتتىك ناگراداسىن تابىس ەتتى جانە كاسىبي قىزمەتىندە جاڭا تابىستار تىلەدى.
ءوز كەزەگىندە وزبەك ديپلوماتى ق ر باسشىلىعى تاراپىنان ونىڭ قىزمەتىنە جوعارى باعا بەرگەنى ءۇشىن مول ريزاشىلىعىن ءبىلدىرىپ، دوستىق، باۋىرلاستىق جانە تاتۋ كورشىلىك رۋحىندا قازاق-وزبەك قاتىناستارىنىڭ ودان ءارى ۇدەمەلى دامۋىنا سەنىم ءبىلدىردى.