بۇۇ باس اسسامبلەياسى 79-شى سەسسياسىنىڭ جوعارى دەڭگەيدەگى اپتالىعى قارساڭىندا ۇيىمنىڭ شتاب-پاتەرىندە «ەرتەڭگى كۇن ءۇشىن كوپجاقتى شەشىمدەر» تاقىرىبىندا ەكى كۇندىك «بولاشاق ءسامميتى» باستالدى.
سامميت جۇمىسىنا قازاقستان رەسپۋبليكاسى پرەمەر-مينيسترىنىڭ ورىنباسارى – سىرتقى ىستەر ءمينيسترى مۇرات نۇرتىلەۋ باستاعان قازاقستاندىق دەلەگاسيا قاتىستى، دەپ حابارلايدى aqshamnews.kz.
بۇل جاھاندىق ءىس-شارا بۇۇ باس حاتشىسى انتونيۋ گۋتەرريشتىڭ باستاماسىمەن وتكىزىلىپ، قازىرگى تاڭداعى جانە كەلەشەكتە تۋىندايتىن ماسەلەلەردىڭ بىرلەسكەن شەشىمدەرىن تابۋعا باعىتتالعان.
ءسامميتتىڭ اشىلۋىندا بۇۇ باسشىسى ءححى عاسىردىڭ سىن-قاتەرلەرى ءححى عاسىردىڭ شەشىمدەرىن تالاپ ەتەدى: جان-جاقتى جانە ينكليۋزيۆتى، سونداي-اق بۇكىل ادامزاتتىڭ تاجىريبەسىنە سۇيەنەتىن نەگىزدەمەلىك شەشىمدەر.
«مەن بۇل سامميتتە بۇۇ جارعىسىنىڭ قۇندىلىقتارىنا نەگىزدەلگەن جاھاندىق ينستيتۋتتاردى زاڭدى، ءادىل جانە ءتيىمدى ەتۋ ءۇشىن تەرەڭ رەفورمالاردى قاراستىرۋعا شاقىردىم»، – دەدى باس حاتشى.
سامميتكە بۇۇ-عا مۇشە ەلدەردىڭ مەملەكەتتەر مەن ۇكىمەتتەردىڭ باسشىلارى، سىرتقى ىستەر مينيسترلەرى، سونداي-اق حالىقارالىق ۇيىمدار مەن ازاماتتىق قوعام وكىلدەرى قاتىستى.
ساپاردىڭ العاشقى كۇنى ق ر سىرتقى ىستەر ءمينيسترى م.نۇرتىلەۋ سەربيانىڭ سىرتقى ىستەر ءمينيسترى ماركو دجۋريچپەن، البانيانىڭ سىرتقى ىستەر ءمينيسترى يگلي حاسانيمەن، انگولانىڭ سىرتقى ىستەر ءمينيسترى تەتە انتونيومەن جانە موڭعوليانىڭ سىرتقى ىستەر ءمينيسترى باتمۋنحيين باتسەسەگپەن ەكىجاقتى كەزدەسۋلەر وتكىزدى.
كەلىسسوزدەر بارىسىندا ساياسي، ساۋدا-ەكونوميكالىق جانە مادەني-گۋمانيتارلىق سالالارداعى ەكىجاقتى ىنتىماقتاستىقتىڭ قازىرگى جاعدايى مەن دامۋ پەرسپەكتيۆالارى تالقىلاندى.
تاراپتار جاھاندىق جانە حالىقارالىق كۇن تارتىبىندەگى وزەكتى ماسەلەلەر بويىنشا پىكىر الماستى، سونداي-اق ءوزارا ءىس-قيمىلدىڭ بارلىق باعىتتارى بويىنشا سىندارلى ديالوگتى جالعاستىرۋعا ۋاعدالاستى.