يندۋستريا جانە ينفراقۇرىلىمدىق دامۋ ءمينيسترى قايىربەك وسكەنبايەۆ «ەۋروپالىق وداق – ورتالىق ازيا: «جاھاندىق ءدالىز» ستراتەگياسى» ءوزارا ىنتىماقتاستىقتى ارتتىرۋعا ارنالعان سامارقاند كونفەرەنسياسىنا قاتىستى، دەپ حابارلايدى Almaty-akshamy.kz.
ۆەدومستۆو باسشىسى «جاڭا گەوساياسي جاعدايداعى قازاقستاننىڭ كولىك جۇيەسى» تاقىرىبىنا ارنالعان پاراللەل سەسسياسىندا كوپشىلىك الدىندا ەلىمىزدىڭ اتالعان باعىتتا ۇستانعان ساياساتىن جەتكىزىپ، وندا وسى ايماق پەن ەۋروپا ەلدەرى اراسىنداعى ترانزيتتىك اعىنداردى قامتاماسىز ەتەتىن ورتا جانە وڭتۇستىك دالىزدەردى دامىتۋعا بايلانىستى قولعا الىنعان جۇمىستاردى ايتىپ بەردى.
سونداي-اق كونفەرەنسياعا قاتىسۋشىلار قازاقستاننىڭ جۇك تاسىمالىنداعى كورسەتكىشتەرى جانە مينيسترلىك جوسپارلاعان 2025 جىلعا دەيىنگى جوبالار تۋرالى مالىمەتكە قانىقتى. ونىڭ ىشىندە اقتاۋ پورتىندا كونتەينەرلىك حاب قۇرۋ، دوستىق-مويىنتى ۋچاسكەسىندە ەكىنشى تەمىرجول مەن الماتى ستانساسىندا اينالما تەمىرجول جەلىسىن سالۋ، ساۋدا فلوتىن كەڭەيتۋ، سونداي-اق جۇك ءترانزيتىنىڭ كولەمىن جىلىنا 10 ملن تونناعا دەيىن ۇلعايتۋ بويىنشا پەرسپەكتيۆالارىمەن تانىستى.
سوڭىندا مينيستر جۇكتەردى تاسىمالداۋدا «وتپەلى» تاريفتىك مولشەرلەمەنى قاراستىراتىن «جاسىل ءدالىزدى» قۇرىپ، جۇك تاسىمالى قۇجات اينالىمىندا «جىكسىز» الماسۋدى جولعا قويۋدى، سونىمەن بىرگە حالىقارالىق نارىقتارعا شىعۋعا مۇمكىندىك بەرەتىن «سيفرلى كولىك ءدالىزىن قالىپتاستىرۋدى ۇسىندى.
يندۋستريا جانە ينفراقۇرىلىمدىق دامۋ ءمينيسترىنىڭ ايتۋىنشا، اتالعان ۇسىنىستار ەۋروپالىق وداق پەن ورتالىق ازيا ەلدەرى اراسىنداعى الىس-بەرىستى تۇراقتى جانە ءقاۋىپسىز ىسكە اسىرۋعا جول اشادى.