قازاقستان اتىنان ۋكراينا، پولشا جانە ۆەنگريا گۋمانيتارلىق كومەك الدى
2021 جىلعا قاراعاندا بيىلعى جىلدىڭ ءبىرىنشى توقسانىندا قازاقستان شەتەلگە كوبىرەك گۋمانيتارلىق كومەك جىبەردى، دەپ حابارلايدى Almaty-akshamy.kz Finprom.kz-كە سىلتەمە جاساپ.
«بيىل قاڭتار-ناۋرىز ايلارىندا قازاقستان باسقا ەلدەرگە 9،4 ملن اقش دوللارى سوماسىنا گۋمانيتارلىق كومەك جىبەردى. تەك ناۋرىز ايىندا كورسەتىلگەن گۋمانيتارلىقتىڭ كومەكتىڭ سوماسى 3،6 ملن اقش دوللارىن قۇرايدى. ال وتكەن جىلى وسى كەزەڭدە قازاقستاننان باسقا ەلگە گۋمانيتارلىق كومەك جىبەرىلمەدى. سونىمەن قاتار، بيىلعى جىلدىڭ ءبىرىنشى توقسانىندا كورسەتىلگەن گۋمانيتارلىق كومەك كولەمى 2021 جىلمەن سالىستىرعاندا $7،5 ملن-عا اسىپ تۇسەدى»، - دەلىنگەن Finprom.kz تاراتقان اقپاراتتا.
بيىل قاڭتار-ناۋرىز ايىندا ەلىمىزدەن جىبەرىلگەن گۋمانيتارلىق كومەكتى اجىراتىپ قاراساق. ءدارى - دارمەك - 4،4 ملن دوللاردى قۇرايدى، ازىق – تۇلىك - $280،8 مىڭ، كيىم-كەشەك پەن اياق كيىم - $94،8 مىڭ اقش دوللارى. سونداي-اق، ماشينالار مەن جابدىقتارعا - 15،4 مىڭ دوللار جانە باسقا دا تاۋارلارعا 4،6 ملن اقش دوللارى جۇمسالدى.
قازاقستان اتىنان ۇسىنىلعان گۋمانيتارلىق كومەكتىڭ ەڭ كوپ كولەمى اۋعانستانعا جونەلتىلدى. ياعني 5،7 ملن اقش دوللارىن قۇرايدى. وسىلايشا اۋعانستان قازاقستاننان گۋمانيتارلىق كومەكتى تۇراقتى تۇردە الۋشى ەل. ودان بولەك، تۇراقتى گۋمانيتارلىق كومەكتى الۋشى ەلدەر اراسىندا تاجىكستان دا بار. 2022 جىلدىڭ ءبىرىنشى توقسانىندا اتالعان مەملەكەتكە 130،1 مىڭ دوللاردىڭ كومەگى جونەلتىلدى.
سونداي-اق، بيىل قازاقستان اتىنان ۋكراينا، پولشا جانە ۆەنگريا گۋمانيتارلىق كومەك الدى. ۋكرايناداعى جاعدايعا بايلانىستى جالپى سوماسى 306 مىڭ دوللارعا 67،7 مىڭ توننا گۋمانيتارلىق كومەك جىبەرىلدى. ونىڭ ىشىندە 202،6 مىڭ دوللارعا 41،2 مىڭ توننا ازىق-تۇلىك، 40،3 مىڭ دوللارعا 6،7 مىڭ توننا كيىم جانە اياق كيىم. سول سەكىلدى 63،1 مىڭ دوللارعا 19،8 مىڭ توننانى قۇرايتىن باسقا دا تاۋارلار جونەلتىلدى.
ال پولشاعا 3،1 ملن سوماسىنداعى اقش دوللارىنا 70،7 مىڭ توننا گۋمانيتارلىق كومەك كورسەتىلدى. اتاپ ايتقاندا، $1،5 ملن-عا 25،2 مىڭ توننا دارى-دارمەك، $23 مىڭعا 8،6 مىڭ توننا ازىق-تۇلىك، $22،9 مىڭعا 4،7 مىڭ توننا كيىم مەن اياق كيىم جانە $ 22،2 مىڭ تونناعا 32،2 مىڭ توننا باسقا تاۋارلار جونەلتىلدى.
سونىمەن قاتار پولشا ۋكراينادان 3،3 ميلليونعا جۋىق بوسقىن قابىلدادى. ال ۋكراينادان كەلگەن بوسقىنداردىڭ جالپى سانى 6 ميلليونعا جۋىق ادامدى قۇرادى. اتاپ ايتقاندا، ۋكراينا ازاماتتارى ءۇشىن گۋمانيتارلىق كومەكپەن الماتىدان پولشانىڭ كاتوۆيسە قالاسىنا جۇك جەتكىزىلدى.
قازاقستان ۆەنگرياعا دا 69،5 مىڭ دوللاردى قۇرايتىن 6،7 مىڭ توننا گۋمانيتارلىق كومەك جىبەردى. ونىڭ ىشىندە $47،2 مىڭ ازىق-تۇلىك تاۋارلارىنا-3،5 مىڭ توننا، $10،9 مىڭ كيىم مەن اياق كيىمگە-1،1 مىڭ توننا، $11،4 مىڭ باسقا تاۋارلارعا-2 مىڭ توننا. ۆەنگريا ۋكراينادان 577،8 مىڭ بوسقىن قابىلدادى.
ال ءبىزدىڭ ەل بيىل قاڭتار–ناۋرىزدا $2،2 ملن سوماعا گۋمانيتارلىق كومەك الدى. بۇل كورسەتكىش قازاقستانعا كورسەتىلگەن كومەكتىڭ 15،1 ەسەگە ارتقانىن كورسەتىپ وتىر. دەگەنمەن 2021 جىلدىڭ سول كەزەڭىمەن سالىستىرعاندا 4،4 ەسەگە از.
الىنعان گۋمانيتارلىق كومەك كولەمىنىڭ جارتىسىنان كوبى دارى-دارمەك ($853،2 مىڭ)، سونداي-اق كيىم مەن اياق كيىم ($484 مىڭ). سول سياقتى ماشينالار مەن جابدىقتارعا 1،6 مىڭ دوللار، باسقا تاۋارلارعا — 881،9 مىڭ دوللاردى قۇرايدى.
بيىل ەلىمىزگە گۋمانيتارلىق كومەكتىڭ ەڭ كوپ كولەمى يتاليادان ($1،7 ملن-عا)، ودان كەيىن جۇڭگو ($476،4 مىڭ) جانە گەرمانيادان ($37،4 مىڭ) باعىتتالدى.