قۇجات 25 ساۋىرگە دەيىن اشىق تالقىدا بولادى
قارجى مينيسترلىگىنە قاراستى مەملەكەتتىك كىرىستەر كوميتەتى «ق ر مەملەكەتتىك شەكاراسى ارقىلى اۆتوموبيل كولىك قۇرالدارىن، جۇكتەر مەن تاۋارلاردى وتكىزۋ، سونداي-اق ولاردى ەلەكتروندىق كەزەك بويىنشا ءوتۋى ءۇشىن تولەماقى مولشەرلەرىن ايقىنداۋ تۋرالى» بۇيرىعىن اشىق تالقىعا شىعاردى، دەپ حابارلايدى Almaty-akshamy.kz قازاقپاراتقا سىلتەمە جاساپ.
قۇجاتقا ساي، ەلىمىزدىڭ شەكاراسى ارقىلى وتەتىن جۇك كولىكتەرىنەن ەندى تولەم الىنادى.
«ق ر مەملەكەتتىك شەكاراسى ارقىلى جۇك اۆتوموبيلدەرىن، ونىڭ ىشىندە تىركەمەلەرى بار جۇك كولىكتەرىن جانە ەرشىكتى تارتقىشتاردى وتكىزۋ ءۇشىن 3 اەك (10 350 تەڭگە) مولشەرىندە اقى بەلگىلەۋ ۇسىنىلادى»، - دەپ جازىلعان كوپشىلىك تالقىلاۋىنا شىعارىلعان قۇجاتتا.
بەلگىلى بولعانداي، اتالعان بۇيرىق 2024 جىلدىڭ 1 قاڭتارىنان باستاپ قولدانىسقا ەنگىزىلەدى.
قۇجات 25 ساۋىرگە دەيىن اشىق تالقىدا بولادى.
ايتا كەتسەك، بۇعان دەيىن پرەمەر-مينيستر ءاليحان سمايىلوۆ سەنات دەپۋتاتىنىڭ ساۋالىنا جولداعان جاۋابىندا قازاقستان-رەسەي شەكاراسىنداعى 27 وتكىزۋ پۋنكتىنىڭ اۋماعى كەڭەيەتىنىن مالىمدەگەن ەدى.