ەلىمىزدە جەكە مەديسينالىق كىتاپشانىڭ ەلەكتروندى ءتۇرى ەنگىزىلەدى

جەكە مەديسينالىق كىتاپشا جۇمىسقا جىبەرىلگەنى تۋرالى بەلگىمەن بەرىلەدى

سانيتارلىق-ەپيدەميولوگيالىق باقىلاۋ كوميتەتى «جەكە مەديسينالىق كىتاپشالاردى بەرۋ، ەسەپكە الۋ جانە جۇرگىزۋ قاعيدالارىن بەكىتۋ تۋرالى» دەنساۋلىق ساقتاۋ ءمينيسترىنىڭ بۇيرىعىنا وزگەرىس ەنگىزبەك، دەپ حابارلايدى Almaty-akshamy.kz قازاقپاراتقا سىلتەمە جاساپ.

قۇجاتتا كورسەتىلگەندەي، ەندى مەديسينالىق كىتاپشا ەكى نۇسقادا بولادى:

- جەكە مەديسينالىق كىتاپشا - جۇمىسقا جىبەرۋ تۋرالى بەلگىسى بار مىندەتتى مەديسينالىق قاراپ-تەكسەرۋلەردىڭ ناتيجەلەرى ەنگىزىلەتىن دەربەس قۇجات؛

- جەكە ەلەكتروندىق مەديسينالىق كىتاپشا - ءتۇپنۇسقا قۇجاتتىڭ ءتۇرى مەن اقپاراتىن (دەرەكتەرىن) ەلەكتروندىق-سيفرلىق نىساندا تولىق جاڭعىرتاتىن قۇجات.

«جەكە مەديسينالىق كىتاپشا جۇمىسقا جىبەرىلگەنى تۋرالى بەلگىمەن بەرىلەدى. ال ەلەكتروندىق مەديسينالىق كىتاپشا جۇمىسقا جىبەرۋ تۋرالى بەلگىسى بار ەلەكتروندىق-سيفرلىق نىساندا بەرىلەدى جانە ەلەكتروندىق سيفرلىق قولتاڭبا ارقىلى كۋالاندىرىلادى. ونى تەك مەديسينالىق قىزمەتكە ليسەنزياسى بار ۇيىم بەرەدى»، - دەلىنگەن بۇيىرىق جوباسىندا.

ەلەكتروندىق مەديسينالىق كىتاپشادا مىنا مالىمەتتەر قامتىلادى:

1. جەكە مەديسينالىق كىتاپشا يەسىنىڭ فوتوسۋرەتى (ەلەكتروندىق فورماتتا).

2. جەكە كۋالىك نەمەسە پاسپورت بويىنشا جەكە مەديسينالىق كىتاپشانىڭ يەسى تۋرالى مالىمەتتەر، ونىڭ قولى، جەكە مەديسينالىق كىتاپشانىڭ سەرياسى مەن ءنومىرى.

3. جەكە مەديسينالىق كىتاپشا يەسىنىڭ كاسىبى مەن لاۋازىمى، جۇمىس ورنى، تۋعان كۇنى، تۇرعىلىقتى جەرى.

ەنگىزىلۋى مۇمكىن ەلەكتروندىق مەديسينالىق كىتاپشادا ازاماتتىڭ دەرتى، ەكپەلەرى، دارىگەر تاعايىنداعان ەم تۇرلەرى سياقتى بارلىق اقپارات كورسەتىلەتىن بولادى.