بيىلعى جىلدىڭ بەس ايىندا 184 شارت جاسالعان.
سوڭعى ءۇش جىلدا ەلىمىزدە شارۋالاردىڭ ساقتاندىرۋعا قىزىعۋشىلىعى ايتارلىقتاي ءوستى، دەپ حابارلايدى Almaty-akshamy.kz ElDala.kz cىلتەمە جاساپ.
اگروسەكتوردا ساقتاندىرۋ شارتتارىنىڭ سانى 2 ەسەگە ارتتى: ەگەر 2020 جىلى 93 شارت جاسالعان بولسا، وسى جىلدىڭ 5 ايىندا وسىمدىك جانە مال شارۋاشىلىعىندا 184 ساقتاندىرۋ شارتىنا قول قويىلدى. بۇل تۋرالى ElDala.kz اگرارلىق نەسيە كورپوراسياسىنىڭ باسپا ءسوز قىزمەتىنە سىلتەمە جاساي وتىرىپ حابارلايدى.
«جىل سايىن اگروساقتاندىرۋعا دەگەن قىزىعۋشىلىق ارتىپ كەلەدى. ەگەر 2020-2021 جىلدارى 254 شارت جاسالىپ، 265،7 مىڭ گەكتاردان استام، 2،6 ملن باس جانۋارلار مەن قۇستار (سونىڭ ىشىندە – ءىرى جانە ۇساق مال، جىلقى مەن قۇس) ساقتاندىرىلعان بولسا، بيىلعى جىلدىڭ 5 ايىندا 184 شارت جاسالىپ، 308 مىڭ گەكتار جانە 60 مىڭنان استام اۋىل شارۋاشىلىعى جانۋارلارى مەن قۇستارى ساقتاندىرىلعان»،- دەپ حابارلادى اگرارلىق نەسيە كورپوراسياسىنىڭ باسپا ءسوز قىزمەتى.
ەرىكتى ساقتاندىرۋ جۇيەسى جۇمىسىنىڭ العاشقى ەكى جىلىندا اۋىل شارۋاشىلىعى تاۋارلارىن وندىرۋشىلەر ساقتاندىرۋ شارتتارىن جاساسۋعا 350 ملن تەڭگە باعىتتادى، مەملەكەت تاعى 350 ملن تەڭگە سۋبسيديا تۇرىندە تولەدى. وسىلايشا، مەملەكەت ساقتاندىرۋ شارتىن جاساسۋ كەزىندەگى شىعىستاردىڭ 50% وزىنە الدى. ناتيجەسىندە اگرارييلەرگە ساقتاندىرۋ جاعدايىنىڭ باستالۋ فاكتىسى بويىنشا تولەمدەر سوماسى 1 ملرد 333 ملن تەڭگەنى قۇرادى.
اكك اعىمداعى جىلدىڭ 5 ايىندا تولەنگەن سۋبسيديا كولەمى 500 ملن تەڭگەدەن اسقانىن اتاپ ءوتتى.
«2004 جىلدان بەرى قولدانىستا بولعان ساقتاندىرۋ جۇيەسى مىندەتتى بولدى جانە تەك وسىمدىك شارۋاشىلىعىن عانا قامتىدى. 2020 جىلدان باستاپ قازاقستاندا ەرىكتى جۇيە جۇمىس ىستەيدى، ول اگروسەكتوردىڭ كەز كەلگەن باعىتىندا ساقتاندىرۋ ءۇشىن مۇمكىندىكتەر بەرەدى. بۇگىنگى ساقتاندىرۋ ونىمدەرىنە وسىمدىك شارۋاشىلىعىن ىلعالدىڭ جەتىسپەۋشىلىگىنەن جانە ارتىعىنان ساقتاندىرۋ، سونداي-اق ءىرى قارا، جىلقى، قوي، قۇستاردى ساقتاندىرۋ كىرەدى»، - دەپ ءتۇسىندىردى انك-دا.
كورپوراسيادا اتاپ وتكەندەي، مەملەكەت ساقتاندىرۋ سىياقىلارىن سۋبسيديالاۋ تۇرىندە قولداۋ كورسەتەدى، بۇل شارۋالاردىڭ شىعىندارىن ازايتۋعا مۇمكىندىك بەرەدى. ساقتاندىرۋ شارتى باعاسىنىڭ 50% اگراريي تولەيدى، 50% مەملەكەت سۋبسيديالايدى. بۇل ماقساتتارعا 2020-2021 جىلدارى 3،5 ملرد تەڭگە ءبولىندى.
ساقتاندىرۋ شارتىن جاساسۋ ءۇشىن ەشقايدا بارۋدىڭ قاجەتى جوق: www.qoldau.kz پلاتفورماسىندا ەلەكتروندىق-سيفرلىق قولتاڭبانىڭ كومەگىمەن ساقتاندىرۋ شارتىن جاساسۋ ونلاين قولجەتىمدى.
انك دەرەكتەرى بويىنشا قازاقستانداعى اگروساقتاندىرۋ جۇيەسىنە الەمدىك نارىقتاعى «ا» رەيتينگىمەن حالىقارالىق قايتا ساقتاندىرۋ كومپانيالارى تارتىلعان. ولار وتاندىق كومپانيالار وزىنە الاتىن تاۋەكەلدەردى قايتا ساقتاندىرادى. بۇل ساقتاندىرۋ جاعدايلارى باستالعان كەزدە كەپىلدەندىرىلگەن تولەمدەردى قامتاماسىز ەتەدى.
ەستەرىڭىزگە سالا كەتەيىك، 2021 جىلدىڭ جەلتوقسان ايىنان باستاپ اگروساقتاندىرۋ وپەراتورى «بايتەرەك» حولدينگىنىڭ ەنشىلەس ۇيىمى - اگرارلىق نەسيە كورپوراسياسى بولىپ تابىلادى.