ەل شاحماتشىلارى فاۆوريتتەردەن باسىم ءتۇستى
شاحماتتان قازاقستان قۇراماسى الەمدىك رەيتينگتە ۇزدىك 8 ەلدىڭ قاتارىنا كىردى، دەپ حابارلايدى Almaty-akshamy.kz.
سپورتشىلار «ونلاين وليمپيادا – 2021» تۋرنيرىندە جوعارى ناتيجە كورسەتىپ، شيرەك فينالعا دەيىن جەتكەن بولاتىن. الايدا اقش قۇراماسىنان جەڭىلىس تاۋىپ، جارىس جولىن اياقتادى.
ەل شاحماتشىلارى توپتىق ديۆيزيوندا تۋرنير ءفاۆوريتى سانالعان ارمەنيا، جۇڭگو، رۋمىنيا سپورتشىلارىنان باسىم ءتۇسىپ، ۇزدىكتەر قاتارىنان كورىنە ءبىلدى.
«مەن بۇل تۋرنيرگە وسىمەن 2 جىل قاتارىنان قاتىستىم. مۇنداي فورماتتا ويناۋ ۇلتتىق قۇراما سپورتشىلارى ءۇشىن ىڭعايلى. وسى جولى شاحماتشىلارىمىز تاريحتا بولماعان جەتىستىككە قول جەتكىزىپ، ۇزدىك 8 ەلدىڭ قاتارىنا كىرگەنىمىزگە قۋانىشتىمىز»،– دەدى شاحماتتان قازاقستان ۇلتتىق قۇراماسىنىڭ مۇشەسى رۋستام حۋسنۋتدينوۆ.