2025 جىلعى 20 اقپان مەن 2 ناۋرىز ارالىعىندا الماتى قالاسىندا ورنالاسقان ADD ارەنا سپورت كەشەنىندە (نۇركەنت شاعىن اۋدانى، 14ب) گرەك-ريم، ەركىن جانە ايەلدەر كۇرەسى بويىنشا قازاقستان رەسپۋبليكاسىنىڭ جاسوسپىرىمدەر مەن جاستار اراسىنداعى U17 جانە U20 ساناتىنداعى چەمپيوناتى وتەدى.
اتالعان بىرىنشىلىككە ەلىمىزدىڭ 17 وبلىسىنان، سونداي-اق استانا، الماتى جانە شىمكەنت قالالارىنان ەڭ ۇزدىك جاس بالۋاندار قاتىسادى. ولار قازاقستان چەمپيونى اتاعى ءۇشىن جانە بيىلعى كۇنتىزبەلىك جىلعا جوسپارلانعان حالىقارالىق جارىستاردا – ازيا جانە الەم چەمپيوناتتارىندا ۇلتتىق قۇراما ساپىندا ەل نامىسىن قورعاۋ مۇمكىندىگى ءۇشىن ب ا ق سىنايدى.
20 اقپاندا ساعات 16:30-دا U17 جانە U20 جاس ساناتتارىنداعى گرەك-ريم، ەركىن جانە ايەلدەر كۇرەسى بويىنشا قازاقستان رەسپۋبليكاسىنىڭ چەمپيوناتىنىڭ سالتاناتتى اشىلۋ ءراسىمى وتەدى. بۇل شاراعا ەلىمىزدىڭ داڭقتى بالۋاندارى – وليمپيادا ويىندارىنىڭ جۇلدەگەرلەرى، الەم جانە ازيا چەمپيوندارى قاتىسىپ، كۇرەس سپورتىنىڭ ءۇش ءستيلىنىڭ دامۋى مەن تانىمالدىعى ارتۋىنا قوسقان ۇلەستەرى اتاپ وتىلەدى.
الماتى قالاسىنىڭ گرەك-ريم، ەركىن جانە ايەلدەر كۇرەسى فەدەراسياسىنىڭ پرەزيدەنتى ومار الييەۆ الداعى ءتۋرنيردىڭ ماڭىزدىلىعىنا توقتالىپ ءوتتى:
- ەڭ الدىمەن، قازاقستان رەسپۋبليكاسىنىڭ گرەك-ريم، ەركىن جانە ايەلدەر كۇرەسى فەدەراسياسىنىڭ باسشىلىعىنا وسىنداي اۋقىمدى جارىستى وتكىزۋگە سەنىم ءبىلدىرىپ، مەگاپوليسىمىزدە ۇيىمداستىرۋ مۇمكىندىگىن بەرگەنى ءۇشىن العىسىمدى بىلدىرەمىن. بۇل جارىس – ەلىمىزدەگى رەسمي جارىستار كۇنتىزبەسىنىڭ اشىلۋى ىسپەتتەس. سونىمەن قاتار، الماتى قالاسىنىڭ سپورت باسقارماسىنا ءتۋرنيردى ۇيىمداستىرۋداعى قولداۋى ءۇشىن ەرەكشە العىس ايتقىم كەلەدى.
سوڭعى ءبىر جىل ىشىندە الماتىدا كۇرەس سپورتىن دامىتۋدا وڭ وزگەرىستەر بولدى، بۇل تۋرالى ءبىز بۇعان دەيىن دە ب ا ق بەتتەرىندە ايتقان ەدىك. الداعى ەل چەمپيوناتى جاس بالۋاندارىمىزعا ءوز شەبەرلىكتەرى مەن قابىلەتتەرىن جوعارى دەڭگەيدە كورسەتۋگە تاماشا مۇمكىندىك بەرەدى.
سپورتشىلارعا ساتتىلىك تىلەي وتىرىپ، بارشا جانكۇيەرلەردى چەمپيوناتتى تاماشالاپ، جاس اتلەتتەرىمىزدى قولداۋعا شاقىرامىن!