شارا بارىسىندا ماماندار ءوزارا تاجىريبەلىك ءىس-قيمىلدار مەن بىرلەسكەن جوبالاردى ۇيىمداستىرۋ ماسەلەلەرىن تالقىلادى.
قازاقستان رەسپۋبليكاسى پرەزيدەنتىنىڭ ارحيۆىندە تمد ەلدەرىنىڭ ارحيۆ مەكەمەلەرى باسشىلارىنىڭ كاسىبي كەزدەسۋى ءوتتى، دەپ حابارلايدى Almaty-akshamy.kz.
ءىس-شاراعا ارمەنيا، ءازىربايجان، قازاقستان، قىرعىزستان، وزبەكستان جانە رەسەي ارحيۆشىلەرى قاتىستى.
ءىس-شارانى اشقان قازاقستان رەسپۋبليكاسى پرەزيدەنتى ءارحيۆىنىڭ ديرەكتورى ءا.ق.مۇستافينا ءارحيۆتىڭ قىزمەتى، قول جەتكىزگەن ناتيجەلەرى، جاڭا باستامالارى مەن پەرسپەكتيۆالىق جوسپارلارى، سونداي-اق اعىمداعى جىلدىڭ ماۋسىمىندا بەكىتىلگەن ارحيۆ قىزمەتىن جەتىلدىرۋ جانە جاڭارتۋ جونىندەگى شارالار كەشەنى اياسىندا ازىرلەنگەن ءارحيۆتى دامىتۋدىڭ 2035 جىلعا دەيىنگى تۇجىرىمداماسى تۋرالى ايتىپ بەردى. ءاليا قۇسايىن قىزى ءبىلىم بەرۋ جوبالارىنا، اتاپ ايتقاندا، جاس ارحيۆشىلەردىڭ حالىقارالىق مەكتەبى تۋرالى توقتالىپ، 2023 جىلى الماتىدا ۇيىمداستىرىلاتىن كەلەسى جاستار فورۋمىنا شاقىردى. ق ر پرەزيدەنتىنىڭ ءارحيۆى ۇسىنىپ وتىرعان تاعى ءبىر حالىقارالىق جوباسى - ارحيۆ ءىسىنىڭ وزەكتى ماسەلەلەرى بويىنشا ۇسىنىستار مەن شەشىمدەردى تالقىلاۋ جانە قابىلداۋ ءۇشىن كاسىبي قاۋىمداستىقتىڭ تۇراقتى جۇمىس ىستەيتىن حالىقارالىق ءۇنقاتىسۋ الاڭىن قۇرۋعا باعىتتالعان «اشىق قوعامعا – اشىق ارحيۆ» ارحيۆشىلەر كونگرەسى بولىپ تابىلادى. كەزدەسۋ قوناقتارىن اعىمداعى جىلدىڭ قازان ايىنا جوسپارلانعان ارحيۆشىلەردىڭ I كونگرەسىنىڭ جۇمىسىنا قاتىسۋعا شاقىردى.
ءارحيۆشى ارىپتەستەرگە ارنايى ەكسكۋرسيا ۇيىمداستىرىلىپ، ولار ءارحيۆتىڭ وقۋ زالى مەن كىتاپحانانىڭ جۇمىسىمەن، ارحيۆتىك قۇجاتتاردى سيفرلاندىرۋ، ميكروفيلمدەۋ جانە قالپىنا كەلتىرۋ پروسەستەرىن كورىپ شىقتى. ەكسكۋرسيا بارىسىندا ارحيۆ قىزمەتكەرلەرى ارىپتەستەرىمەن ءوز تاجىريبەلەرىمەن ءبولىسىپ، كوپتەگەن سۇراقتارعا جاۋاپ بەردى، زاماناۋي ارحيۆ جابدىقتارىن قولدانۋ جونىندە پىكىر الماستى. سونىمەن قاتار قوناقتارعا م.ق.قوزىبايەۆ پەن ج.ش.شاياحمەتوۆتىڭ جەكە تەكتىك قورلارى بويىنشا دايىندالعان قۇجاتتار جيناقتارى جانە قازاقستان رەسپۋبليكاسى پرەزيدەنتى ءارحيۆىنىڭ قورلارى بويىنشا 2021 جىلى باسىلىپ شىققان جونسىلتەر سىيعا بەرىلدى.
كەزدەسۋگە تمد اتقارۋشى كوميتەتى ەكونوميكالىق ىنتىماقتاستىق دەپارتامەنتىنىڭ كونسۋلتانتى م.ا. كۋلاگينا؛ ءازىربايجان رەسپۋبليكاسى ۇلتتىق ءارحيۆى باسقارماسىنىڭ جاريالاۋ جانە پايدالانۋ ءبولىمىنىڭ مەڭگەرۋشىسى ن.س. ەمينوۆ؛ ارمەنيا رەسپۋبليكاسىنىڭ ۇلتتىق ءارحيۆىنىڭ ديرەكتورى گ.م.ارشاكيان؛ قازاقستان رەسپۋبليكاسى مادەنيەت جانە سپورت مينيسترلىگىنىڭ ارحيۆ ءىسى جانە قۇجاتتاما كوميتەتىنىڭ ءتوراعاسى ب.ق.بوراش جانە ۋاكىلدى تۇلعالار قاتىستى.
كەزدەسۋ بارىسىندا جينالعاندار تمد ەلدەرىنىڭ ارحيۆ مەكەمەلەرىمەن ءوزارا تاجىريبەلىك ءىس-قيمىلدار مەن بىرلەسكەن جوبالاردى ۇيىمداستىرۋ ماسەلەلەرىن تالقىلادى.
