"بايتەرەك" كەشەنىن قۇرۋعا 46،7 ملرد تەڭگە بولىنەدى.
قازاقستان رەسەيمەن بىرلەسكەن عارىش جوباسىنا 46 ملرد تەڭگەدەن استام قارجى ءبولۋدى جوسپارلاپ وتىر، دەپ حابارلايدى Almaty-akshamy.kz LS سىلتەمە جاساپ.
سيفرلىق دامۋ مينيسترلىگىنىڭ بيۋدجەتتىك باعدارلاماسىنا سايكەس، 2023 جىلى پيلوتسىز اپپاراتتاردى ۇشىرۋ ءۇشىن جاڭا بۋىن ورتا كلاستى عارىشتىق ماقساتتاعى زىمىران بازاسىندا "بايتەرەك" كەشەنىن قۇرۋعا 46،7 ملرد تەڭگە بولىنەدى.
اتالعان كەشەن ەسەبىنەن "بايقوڭىر" عارىش ايلاعىنىڭ بەلسەندىلىگى ساقتالادى، 500 جاڭا جۇمىس ورنى قۇرىلىپ، ال قازاقستان ۇشىرۋ قىزمەتتەرى نارىعىنا شىعادى دەپ كۇتىلۋدە.
2022 جىلى قارجىلاندىرۋ كولەمى 14،4 ملرد تەڭگەنى، 2021 جىلى – 14،1 ملرد تەڭگەنى، 2020 جىلى – 93،1 ملن تەڭگەنى قۇرادى.
مينيسترلىكتە شىعىنداردىڭ قولدانىستاعى "زەنيت-م" عارىشتىق زىمىران كەشەنىن جاڭعىرتۋعا باعىتتالعانىن ناقتىلادى. ءوز كەزەگىندە رەسەي تاراپى "سويۋز-5" ورتا كلاستى جاڭا زىمىران تاسىعىشتى جاساۋمەن اينالىسادى.
سيفرلىق دامۋ مينيسترلىگىنىڭ مالىمەتىنشە، جاڭا زىمىران، "سويۋز-2" زىمىران تاسىعىش سياقتى كەروسين (نافتيل) جانە سۇيىق وتتەگى سياقتى ەكولوگيالىق تازا وتىن كومپونەنتتەرىن پايدالانادى. بۇل رەتتە جانارماي (كەروسين رگ-1) رەسەي تاراپىمەن زىمىران تاسىعىشتى ىسكە قوسۋ شەڭبەرىندە جەكە شارت بويىنشا جەتكىزىلەدى. سۇيىق وتتەگى عارىش ايلاعىنىڭ وتتەگى-ازوت زاۋىتىندا قورشاعان اتموسفەرادان ءونىم الۋ ارقىلى وندىرىلەدى.
ەستەرىڭىزگە سالا كەتەيىك، بۇعان دەيىن مينيسترلىكتە "بايتەرەكتى" ىسكە قوسۋ مەرزىمى 2024 جىلعا اۋىستىرىلعانىن حابارلاعان بولاتىن.