قازاقستان جۇڭگو مەن ەۋروپا اراسىنداعى جۇك تاسىمالىن ارتتىرۋدى كوزدەپ وتىر

الماتى ستانسياسىن اينالىپ وتەتىن جەتىگەن – قازىبەك بەك اينالما تەمىرجول جەلىسىن سالۋدى جوسپارلاپ وتىر.

ورتالىق كوممۋنيكاسيالار قىزمەتىندە كولىك-ترانزيت الەۋەتىن دامىتۋ تاقىرىبىندا جيىن ءوتتى. وندا تەمىرجول جەلىلەرىن جەتىلدىرۋ جولدارى ايتىلدى، دەپ جازادى Almaty-akshamy.kz Inbusiness.kz سىلتەمە جاساپ.

«قازاقستان تەمىر جولى» كومپانياسى باسقارما ءتوراعاسىنىڭ ورىنباسارى قانات الماعامبەتوۆتىڭ ايتۋى بويىنشا، «دوستىق-مويىنتى» تەمىرجول ءدالىزىن جاڭعىرتۋ جوباسى «قۋاتتى وڭىرلەر – ەل دامۋىنىڭ درايۆەرى» ۇلتتىق جوباسىنا ەنگىزىلدى. ونى ىسكە اسىرۋ جۇكتەردى تاسىمالداۋ جىلدامدىعىن جانە جۇڭگو – ەۋروپا – جۇڭگو ترانزيتتىك ءدالىزى بويىنشا تەمىرجول ينفراقۇرىلىمىنىڭ وتكىزۋ قابىلەتىن بەس ەسەگە ارتتىرادى.

بۇدان باسقا، كومپانيا داربازا-ماقتاارال تەمىرجول جەلىسى مەن الماتى ستانسياسىن اينالىپ وتەتىن جەتىگەن – قازىبەك بەك اينالما تەمىرجول جەلىسىن سالۋدى جوسپارلاپ وتىر.

«داربازا-ماقتاارال جەلىسى سارىاعاش مەملەكەتارالىق ءتۇيىسۋ پۋنكتى مەن تاشكەنت تورابىندا ينفراقۇرىلىمدىق شەكتەۋلەردى «كەستەلەۋگە» مۇمكىندىك بەرەدى. جەتىگەن-قازىبەك بەك اينالما جولى جۇك اعىنىن قايتا باعدارلاۋ ەسەبىنەن الماتى تورابىنىڭ جۇكتەمەسىن كەمىتۋدى  قامتاماسىز ەتەدى جانە جۇكتەردى جەتكىزۋ ۋاقىتىن قىسقارتادى»، - دەيدى الماعامبەتوۆ.