23 ملن توننادان استامدى قۇرادى.
قازاقستان مەن جۇڭگو اراسىنداعى تەمىرجولمەن جۇك تاسىمالداۋ 2022 جىلى رەكوردتىق كورسەتكىشكە جەتىپ، 23 ملن توننادان استامدى قۇرادى. بۇل تۋرالى «قازاقستان تەمىر جولى» ۇك» اق باسپا ءسوز قىزمەتى مالىمدەدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
بۇل سان 2021 جىلمەن سالىستىرعاندا 15%-كە كوپ. بۇل رەتتە قازاقستاندىق كاسىپورىنداردىڭ ەكسپورتتىق جونەلتىلىمدەرى: تەمىر كەنى (+17%)، ءتۇستى كەن (+45%)، قارا مەتالدار (+6%)، كونتەينەرلەردەگى استىق جۇكتەرى (+70%) جانە باسقا دا جۇكتەر (+83%) ونىمدەرىن تاسىمالداۋدىڭ ءوسۋى ەسەبىنەن 17%-كە ۇلعايدى.
«جوعارى كورسەتكىشتەرگە ەكى ەل تەمىرجولشىلارىنىڭ ۇيلەسىمدى جۇمىسى ەسەبىنەن قول جەتكىزىلدى. «قتج» ۇك» اق مەن جۇڭگو تەمىرجول اكىمشىلىكتەرى بىرلەسىپ پويىزداردى كەدەرگىسىز قابىلداۋ-بەرۋدى، وتكەلدەردىڭ قۋاتىن ءتيىمدى پايدالانۋدى قامتاماسىز ەتۋ بويىنشا جۇمىس جۇرگىزدى. الماتى جۇك تاسىمالداۋ بولىمشەسىنىڭ، دوستىق جانە التىنكول ستانسيالارىنىڭ تەمىرجولشىلارى جۇكتەردى قابىلداۋ-تاپسىرۋ بويىنشا جۇمىستى ناقتى جانە ۋاقتىلى ۇيىمداستىرا الاتىندىعىن كورسەتتى»، - دەپ جازدى ۆەدومستۆودان.
جۇڭگو باعىتىندا جۇكتەردى تاسىمالداۋعا سۇرانىستىڭ ارتۋىن ەسكەرە وتىرىپ، تەمىرجول ينفراقۇرىلىمىن جەدەل دامىتۋ بويىنشا شارالار قابىلدانۋدا.
وتاندىق ءونىمدى ۇزدىكسىز تاسىمالداۋدى قامتاماسىز ەتۋ جانە ەلدىڭ ترانزيتتىك الەۋەتىن دامىتۋ ءۇشىن وتكەن جىلدىڭ قاراشا ايىندا دوستىق-مويىنتى ۋچاسكەسىندە ەكىنشى جولداردىڭ قۇرىلىسى باستالدى. جوبانى ىسكە اسىرعاننان كەيىن ۋچاسكەنىڭ وتكىزۋ قابىلەتى 5 ەسەگە (جۇك پويىزدارىنىڭ 12 جۇبىنان تاۋلىگىنە 60 جۇپقا دەيىن) ارتادى. قازىرگى ۋاقىتتا اياگوز-باقتى ءۇشىنشى تەمىرجول شەكارا وتكەلىن سالۋ بويىنشا تەحنيكالىق-ەكونوميكالىق نەگىزدەمە ازىرلەنۋدە.
وسى ءىرى ينفراقۇرىلىمدىق جوبالاردى ىسكە اسىرۋ قازاقستان ەكونوميكاسىنىڭ دامۋىنا سەرپىن بەرەدى جانە ەلدەر اراسىنداعى جۇك اعىنىن ارتتىرۋعا قىزمەت ەتەدى.