تۇقىمدار ارامشوپتەردەن تازارتىلعان.
پرەزيدەنت قاسىم-جومارت توقايەۆتىڭ تاپسىرماسىن ىسكە اسىرۋ اياسىندا قىرعىزستانعا قازاقستاننان 1000 توننا وتاندىق ىرىكتەلگەن بيداي تۇقىمى تۇرىندە ىزگىلىك كومەك جەتكىزىلدى، دەپ حابارلايدى Almaty-akshamy.kz ق ر سىرتقى ىستەر مينيسترلىگىنىڭ باسپا ءسوز قىزمەتىنە سىلتەمە جاساپ.
جۇكتى تاپسىرۋ ءراسىمى «بىشكەك-1» تەمىرجول ستانساسىندا قازاقستاننىڭ قىرعىزستانداعى ەلشىسى ءراپىل جوشىبايەۆ پەن قىرعىزستاننىڭ اۋىل شارۋاشىلىعى ءمينيسترى اسكاربەك دجانىبەكوۆتىڭ قاتىسۋىمەن ءوتتى. مينيستر ىرىكتەلگەن بيداي تۇقىمدارىمەن قامتاماسىز ەتۋدە قولداۋ كورسەتكەنى ءۇشىن قازاقستان تاراپىنا شىنايى ريزاشىلىعىن ءبىلدىردى جانە بۇل ەل فەرمەرلەرى شىعاراتىن ءونىمنىڭ ساپاسى مەن ونىمدىلىگىنىڭ وسۋىنە اسەر ەتەتىنىن ايتىپ ءوتتى.
«ىرىكتەلگەن تۇقىم تۇرىندەگى ىزگىلىك كومەك وتاندىق تۇقىم ساپاسىن ارتتىرادى. «قارابالىق-20» سورتىنىڭ قازاقستاندىق تۇقىمدارى سەبۋ ستاندارتىنىڭ ءبىرىنشى ساناتىنا مىناداي سورتتىق جانە سەبۋ ساپاسىمەن سايكەس كەلەدى: ىلعالدىلىعى 14%-تەن اسپايدى، ونگىشتىگى 95%-تەن كەم ەمەس، سورتتىق تازالىعى 99،7%-تەن كەم ەمەس. تۇقىمدار كارانتيندىك ارامشوپتەردەن، اۋرۋلاردان جانە كەز كەلگەن بوتەن يىستەردەن تازارتىلعان»، – دەپ اتاپ ءوتتى ا.دجانىبەكوۆ.