وڭتۇستىك كورەيانىڭ چوللا پروۆينسياسىندا وتكەن كورەي كۇرەسىنەن الەم چەمپيوناتىنا 10 ەلدىڭ سپورتشىلارى قاتىستى. بۇل تۋرنيردە 140 كەلىگە دەيىنگى سالماق دارەجەسىندە بەلدەسۋ ءوتتى. قازاقستان قۇراماسىنىڭ نامىسىن قازاق كۇرەسىنىڭ چەمپيوندارى قايسار شامشيدين مەن التىنبەك اۋساعيتوۆ قورعادى، دەپ حابارلايدى aqshamnews.kz
قايسار شامشيدين تۋرنيردە العاشقى ەكى بەلدەسۋىندە قارسىلاستارىن جەڭىپ، ءبىراق ءۇشىنشى كەزدەسۋدە يسپانيالىق راۋل مەنسەگە ەسە جىبەردى. قايساردىڭ ايتۋىنشا، جاڭا كۇرەس تۇرىنە ۇيرەنۋ وڭاي بولمادى.
"ەندى ءبىرىنشى رەت كۇرەسكەن سوڭ ءسال ىڭعايسىزداۋ. ەرەجەسىن دۇرىس بىلمەيمىز ءالى، قالاي كۇرەسۋ كەرەك، نە ىستەۋ كەرەك، بارلىعىن ءتۇسىنۋ قيىن بولدى. ءوزىمىز قازاق كۇرەسىمەن كۇرەسەمىز، وندا بىزدە ارنايى ماتراسىمىز بار، ال ولار قۇمنىڭ ۇستىندە كۇرەسەدى. سوندىقتان كىشكەنە ىڭعايسىز بولدى"، — دەدى قايسار شامشيدين.
بۇل كورەي كۇرەسىنىڭ العاشقى حالىقارالىق چەمپيوناتى 2011 جىلى وتكەن بولاتىن. كورەي كۇرەسىنىڭ ەرەكشەلىگى — سپورتشىلار قۇمدا، سىرت كيىمسىز بەلدەسەدى، بۇل كۇرەستىڭ وزىندىك قيىندىقتارى مەن ەرەكشەلىكتەرىن تۋعىزادى. قازاقستان بۇل چەمپيوناتقا ءتورتىنشى رەت قاتىسىپ وتىر.
قازاقستان قۇراماسىنىڭ باپكەرى چان رە حۆان ەكى كۇن عانا دايىندىقپەن تۋرنيرگە شىققان سپورتشىلار جاقسى ناتيجە كورسەتتى دەپ باعالادى.
"قازاقستاندىق سپورتشىلارمەن ەكى كۇن عانا دايىندالدىق، سوندىقتان ولاردىڭ كورسەتكەن ناتيجەلەرى جاقسى دەپ ويلايمىن. قازاق كۇرەسى مەن كورەي كۇرەسى سسيرىمنان مۇلدەم وزگەشە. مەن ءوزىم دۇنيەجۇزىلىك كوشپەندىلەر ويىندارىنا قاتىسقان كەزدە قازاق كۇرەسى بويىنشا تۋرنيردە تەحنيكانىڭ جەتىسپەۋشىلىگىنەن ءبىراز قيىندىقتار تۋىنداعان ەدى"، — دەدى باپكەر.
بيىلعى جارىستا قازاقستاندىق پالۋاندار جەرگىلىكتى تۇرعىندارعا قازاق كۇرەسى ەرەجەلەرىمەن تانىستىردى، بۇل مادەني جانە سپورتتىق الماسۋ ءۇشىن ۇلكەن مۇمكىندىك بولدى.