ويىن باعدارلاماسىنا 50-گە جۋىق سپورت ءتۇرى ەنگەن.
29 قىركۇيەك پەن 4 قازان ارالىعىندا تۇركيانىڭ يزنيك قالاسىندا IV دۇنيەجۇزىلىك كوشپەندىلەر ويىندارى وتەدى. وعان قازاقستان قۇراماسى كوكپار، جامبى اتۋ، قازاق كۇرەسى، ءداستۇرلى ساداق اتۋ سەكىلدى سپورت تۇرلەرىنەن قاتىسادى. تەڭگە ءىلۋ مەن اۋدارىسپاق سپورتشىلارى كورسەتىلىم جاسايدى. بۇل تۋرالى ورتالىق كوممۋنيكاسيالار قىزمەتىندە وتكەن بريفينگتە سپورت جانە دەنە شىنىقتىرۋ كوميتەتىنىڭ ءتوراعاسى سامات ەرعالييەۆ ايتتى، دەپ حابارلايدى Almaty-akshamy.jz Inbusiness.kz سىلتەمە جاساپ.
«دۇنيەجۇزىلىك كوشپەندىلەر ويىندارى – تۇركى الەمىنىڭ ورتاق قۇندىلىقتارىن الەمگە پاش ەتىپ، كوشپەندىلەر مۇراسىن ناسيحاتتاۋدا ۇلكەن جوبا بولىپ كەلە جاتقان سپورتتىق شارا» - دەدى كوميتەت باسشىسى.
سپيكەردىڭ ايتۋىنشا، ويىن باعدارلاماسىنا 50-گە جۋىق سپورت ءتۇرى ەنگەن. بۇل شاراعا قازاق كۇرەسىنەن تۇڭعىش رەت قازاقستان ايەلدەر قۇراماسى سايىسقا تۇسەدى.
«سايىس تۇركيانىڭ يزنيك قالاسىندا وتەدى. وعان قازاقستان اتىنان جالپى 80-گە جۋىق دەلەگات قاتىسادى. ونىڭ ىشىندە 49 سپورتشى بار. بۇل سپورتشىلاردىڭ 50 پايىزى مەملەكەت بولگەن قارجى ەسەبىنەن، ال قالعان 50 پايىزى ۇيىمداستىرۋشى تاراپتىڭ ەسەبىنەن بارادى. سونىمەن قاتار، ءبىز قازاق كۇرەسىنەن تۇڭعىش رەت ايەلدەر قۇراما كومانداسىن دا الىپ بارا جاتىرمىز. 3 سپورتشى ايەل بولادى»، - دەپ اتاپ ءوتتى سامات ەرعالييەۆ.