قازاقستان قۇراماسى العاش رەت سوككادان الەم چەمپيوناتىنىڭ التىن مەدالىن يەلەندى

گەرمانيانىڭ ەسسەن قالاسىندا سوككادان الەم چەمپيوناتىنىڭ فينالدىق ماچى ءوتتى.

وندا قازاقستان مەن ۋكراينا قۇراماسى باس جۇلدەگە تالاستى، دەپ حابارلايدى Almaty-akshamy.kz Sports.kz-كە سىلتەمە جاساپ.

سوككا – شاعىن فۋتبولدىڭ ءبىر ءتۇرى. ايىرماشىلىعى ويىنشى سانى مەن الاڭنىڭ كولەمىندە. ماچ 20 مينۋتتان ەكى تايم بولادى جانە ءار كوماندادا 6 ويىنشىدان قاتىسادى.

بۇل ويىندى ريەۆانش دەپ تە اتاۋعا بولادى. سەبەبى كوماندالار 2023 جىلعى الەم چەمپيوناتىنىڭ توپتىق كەزەڭىندە كەزدەسىپ، وندا ۋكراينا 6:2 ەسەبىمەن باسىم تۇسكەن ەدى.

ونىنشى مينۋتتا اباي ەلەمەسوۆ قازاقستاندىقتاردى العا شىعارسا، 14-مينۋتتا التىنبەك مىرزابەكوۆ ەسەپتى ەسەلەدى. 18-مينۋتتا قارسىلاس كوماندا ويىنشىسى اندرەي مەلنيك العاشقى گولىن سوقسا، 37-مينۋتتا دۋبل اۆتورى اتانىپ، ەسەپتى تەڭەستىردى.

ماچتىڭ نەگىزگى ۋاقىتى تەڭ اياقتالىپ، ويىن بۋلليت سەرياسىمەن جالعاستى. وندا قازاقستاندىقتار 2:1 ەسەبىمەن جەڭىسكە جەتتى. قورىتىندى ەسەپ – 4:3. وسىلايشا، قازاقستان قۇراماسى ءوز تاريحىندا العاش رەت سوككادان الەم چەمپيوناتىنىڭ التىن مەدالىن يەلەندى. 2022 جىلى ۇلتتىق كوماندا فينالدىق ماچتا برازيليادان 0:3 ەسەبىمەن جەڭىلىپ، «كۇمىستى» قاناعات تۇتقان بولاتىن.