XX-شى قىسقى سۋردليمپيادادا قازاقستان ەرلەر قۇراما كومانداسى كلاسسيكالىق شاحماتتان 10 ۇپاي جيناپ، قولا مەدالعا يە بولدى.
ال جارىستىڭ التىن جۇلدەسىن 12 ۇپاي جيناعان حورۆاتيانىڭ سپورتشىلارى جەڭدى، كۇمىس مەدال 11 ۇپاي جيناعان پولشا كومانداسىنا بۇيىردى، دەپ حابارلايدى اlmaty-akshamy.kz. ۇلتتىق قۇراما ساپىندا سۇلتان قوجاحمەتوۆ، ساماجان كەتتەبەكوۆ، ماكسيم روجكوۆ، امانگەلدى ناۋرىزعالييەۆ، مەيرمان پەرنەيەۆ جانە ۆيكتور ماكسيمەنكو وينادى.
«كلاسسيكالىق شاحماتتان جارىس قىزۋ ءوتتى، قارسىلاستارىمىز وسال بولمادى. ويىن بارىسىندا ەلىمىزدىڭ سپورتشىلارى يتاليا، گەرمانيا جانە سەربيا قۇراما كوماندالارىن جەڭىپ، ۋكراينا مەن پولشا كوماندالارىمەن تەڭ ويناپ، تەك حورۆاتيا كومانداسىنا ەسە جىبەرگەن بولاتىن. جارىستىڭ ناتيجەسىندە كوماندامىز 7 تۋردان ءوتىپ، ون ءۇش كوماندا اراسىندا ءۇشىنشى ورىنعا تۇراقتادى»، - دەدى شاحماتتان اعا جاتتىقتىرۋشى ەلدوس كۇزەربايەۆ.
ايتا كەتەيىك، XX-شى قىسقى سۋردليمپيادا تۇركيانىڭ ەرزۋرۋم قالاسىندا 2-12 ناۋرىز ارالىعىندا ءوتتى. جارىسقا قازاقستان اتىنان 26 سپورتشى (شاحماتتان، سنوۋبوردتان جانە شاڭعى جارىسىنان) قاتىستى.