الماتىنىڭ قالا قۇرىلىسىن باقىلاۋ باسقارماسىنىڭ مالىمەتىنشە، «قازاقستان» قوناق ءۇيىنىڭ جانىنداعى سۋبۇرقاقتى قايتا جاڭارتۋ بويىنشا قۇرىلىس-مونتاج جۇمىستارى رۇقساتسىز جۇرگىزىلدى، دەپ حابارلايدى almaty-akshamy.kz
«نىساندا جۇمىس توقتاتىلدى، «Crown Star» ج ش س مەنشىك يەسىنە قاتىستى جوسپاردان تىس تەكسەرىس ناتيجەسىندە بۇزۋشىلىقتاردى جويۋعا نۇسقاما بەرە وتىرىپ، ق ر اقبتك-نىڭ 316-بابى 1، 321-بولىگى بويىنشا شارالار قابىلداندى. بۇگىندە باسقارما ۇيعارىمدى ءماجبۇرلى ورىنداۋ ءۇشىن سوتقا تالاپ ارىز بەرەدى»، - دەلىنگەن ۆەدومستۆو حابارلاماسىندا.
الماتى قالاسى مادەنيەت باسقارماسىنىڭ حابارلاۋىنشا، قوناق ءۇيدىڭ جانىندا كورسەتىلگەن سۋبۇرقاق ەسكەرتكىش بولىپ تابىلمايدى، الايدا ول كۇزەت ايماعىنىڭ اۋماعىندا ورنالاسقان:
«قازاقستان» قوناق ءۇيىنىڭ عيماراتى الماتى قالاسى اكىمدىگىنىڭ 2021 جىلعى 17 ناۋرىزداعى قاۋلىسىنا سايكەس، الماتى قالاسىنىڭ جەرگىلىكتى ماڭىزى بار تاريح جانە مادەنيەت ەسكەرتكىشتەرىنىڭ مەملەكەتتىك تىزىمىنە ەنگىزىلدى. وسىعان بايلانىستى، نىسان اۋماعىندا قانداي دا ءبىر قۇرىلىس نەمەسە جاڭارتۋ جۇمىستارىن جۇرگىزۋ ءۇشىن مەنشىك يەسىنە ءتيىستى عىلىمي-جوبالاۋ قۇجاتتاماسىن دايىنداۋ جانە عىلىمي-رەستاۆراسيالاۋ جۇمىستار جۇرگىزۋ قاجەتتىلىگىن نەگىزدەۋ قاجەت. الايدا بۇل ورىندالمادى، عيماراتتىڭ يەسى باسقارماعا جۇگىنبەدى».
بيىل ساۋىردە مادەنيەت باسقارماسىنىڭ قىزمەتكەرلەرى شاعىم تۇسكەن نىساندى تەكسەرىپ، «Crown Star» ج ش س قوناق ءۇي يەسىنەن كۇزەت ايماعىنىڭ اۋماعىندا قۇرىلىس جۇمىستارىن توقتاتۋدى جانە بۇزۋشىلىقتاردى جويۋدى تالاپ ەتتى. بۇعان قوسا، 2024 جىلى 24 مامىردا الماتى قالاسى مەدەۋ اۋدانىنىڭ پروكۋراتۋراسىنا قوناق ءۇي يەسىن جاۋاپكەرشىلىككە تارتۋ تۋرالى سۇراۋ جىبەرىلدى.