قازاقستانعا اكەلىنەتىن يمپورتتىق ونىمدەر مەن تاۋارلاردىڭ باعاسى ءبىر جىلدا 13%-عا قىمباتتاعان.
اقپان ايىنىڭ قورىتىندىسى بويىنشا، ىشكى نارىقتاعى ازىق-تۇلىك تاۋارلارىنىڭ تۇتىنۋشىلىق باعاسى ءبىر جىل ىشىندە 10 پايىزعا ءوستى، دەپ حابارلايدى Almaty-akshamy.kz ەnergyprom.kz سايتىنا سىلتەمە جاساپ.
بيىلعى جىلدىڭ قاڭتار ايىنىڭ قورىتىندىسى بويىنشا، قازاقستاندىق كومپانيالار نارىقتىڭ ۇنعا (سۇرانىستىڭ 99،7%-ىن وتاندىق ءوندىرىس قامتاماسىز ەتكەن)، جۇمىرتقاعا (97،2%)، جارما مەن كۇرىشكە (96،6%) قىزىل ەت پەن قۇس ەتىنە (95،5%)، وسىمدىك مايىنا (88،8%)، سونداي-اق ماكارون ونىمدەرى، كەسپە جانە باسقا دا سوعان ۇقساس ۇن ونىمدەرگە (85،1%) قاجەتتىلىگىن جەتكىلىكتى دەڭگەيدە جەرگىلىكتى ونىممەن قامتاماسىز ەتە الدى.
ءسۇت ونىمدەرىنىڭ سەگمەنتىنە كەلەتىن بولساق (جاڭا ءسۇتتى قوسپاعاندا)، مۇندا تۇتاستاي العاندا بۇكىل ءونىم جەلىسى بويىنشا ءوزىن-وزى قامتاماسىز ەتۋ دەڭگەيى جامان ەمەس، ياعني 84،4% كورسەتكىشكە يە، دەگەنمەن جەكەلەگەن ءونىم توپتارى بويىنشا جاعداي باسقاشا ەكەنى بايقالدى. وسىلايشا، جەرگىلىكتى كومپانيالار سارى مايعا دەگەن سۇرانىستى نەبارى 67،9%-عا، ال ىرىمشىك پەن سۇزبەگە ودان دا از، نەبارى 53،7%-عا عانا قامتاماسىز ەتە العان.
سونىمەن قاتار، شۇجىق ونىمدەرى (بۇل جەردە جەرگىلىكتى كومپانيالار 62،3%)، جەمىس-كوكونىس شىرىندارى (50،2%)، وڭدەلگەن جانە كونسەرۆىلەنگەن بالىق، شايان تارىزدىلەر مەن مولليۋسكالار (47،6%)، شوكولاد (36،2%) قانت (35،8%)، شاي جانە كوفە (بار بولعانى 29،9%) سياقتى ازىق-تۇلىك سەكتورلارى يمپورتقا تاۋەلدى بولىپ وتىر.
الكوگول ونىمدەرىنىڭ ىشىندە جەرگىلىكتى كومپانيالار سىراعا دەگەن سۇرانىستى 93،2%-عا، اراق پەن الكوگولدىك سۋسىندارعا – 77،9%-عا، كونياك پەن كونياك سۋسىندارىنا – 58،6%-عا، شاراپتارعا – 49،4%-عا (ءبىراق شاراپتار اراسىندا تىكەلەي شامپانعا – 95،5%-عا) سۇرانىستى وتەپ وتىر.
اعىمداعى جىلدىڭ قاڭتار ايىندا يمپورتتىق ونىمدەر مەن تاۋارلاردىڭ باعاسى ءبىر جىل ىشىندە 12،8%-عا ءوستى. سونىڭ ىشىندە تمد ەلدەرىنەن كەلەتىن ونىمدەردىڭ قازاقستان ءۇشىن يمپورتتىق باعاسىنىڭ دەڭگەيى ايتارلىقتاي 21،3%-عا، باسقا ەلدەردەن تاسىمالداناتىن زاتتاردىڭ باعاسى – 4،9%-عا ءوستى.
ازىق-تۇلىك تاۋارلارىنىڭ ىشىندە قانت پەن قانت قوسىلاتىن كونديتەرلىك ونىمدەردىڭ (بىردەن 38،7%)، ەت، بالىق نەمەسە شايان تارىزدىلەر، مولليۋسكالار جانە باسقا دا ومىرتقاسىز سۋ جانۋارلارىنان الىنعان دايىن ونىمدەر (32،3%)، جانۋارلار نەمەسە وسىمدىكتەن الىناتىن توڭ مايلار مەن مايلار (26،9%-عا)، شۇجىق جانە سوعان ۇقساس ەت ونىمدەرى (20،6%-عا)، بالىق جانە ۇلۋلار (19،6%-عا)، كۇنباعىس مايى (15%-عا) باعاسى ايتارلىقتاي ءوستى.
ەلىمىزدىڭ ىشكى نارىعىندا اعىمداعى جىلدىڭ اقپان ايىنىڭ قورىتىندىسى بويىنشا ازىق-تۇلىك تاۋارلارىنىڭ تۇتىنۋشىلىق باعاسى ءبىر جىل ىشىندە 10 پايىزعا قىمباتاعان. وڭىرلىك تۇرعىدان العاندا، باعانىڭ قاتتى قىمباتشىلىعىن اقمولا، ماڭعىستاۋ جانە اقتوبە وبلىستارىنىڭ تۇرعىندارى سەزىندى.
ازىق-تۇلىك ونىمدەرىنىڭ ىشىندە جارما (16%-عا)، ماي جانە توڭ ماي (14،1%-عا)، ماكارون ونىمدەرى (12،5%-عا)، جەمىستەر مەن كوكونىستەر (12،4%-عا)، ۇن (11،1%-عا)، ەت (11،1%-عا)، قانت (11%-عا) باعاسى ايتارلىقتاي قىمباتتادى.