رەسپۋبليكا كۇنى – ۇلتتىق مەرەكە.
مەملەكەت باسشىسى قاسىم-جومارت توقايەۆ رەسپۋبليكا كۇنى ەلىمىزدە ءبىراز جىل ءوز دەڭگەيىندە اتاپ وتىلمەگەنى جايلى ايتتى، دەپ حابارلايدى Almaty-akshamy.kz اقوردانىڭ باسپا ءسوز قىزمەتىنە سىلتەمە جاساپ.
«ۇلى اباي ايتقانداي، «اقىرىن ءجۇرىپ، انىق باسا» وتىرىپ، ەشقانداي دۇربەلەڭسىز تاۋەلسىزدىككە قول جەتكىزدىك. ەڭ باستىسى، ءبىز بابالار اڭساعان ازات ەلگە اينالدىق. الەم مويىنداعان، قۇرمەت تۇتقان مەملەكەت اتاندىق. مۇنىڭ بارلىعى – بۇكىل حالقىمىزدىڭ ورتاق ەڭبەگىنىڭ جەمىسى. رەسپۋبليكا كۇنىنىڭ باستى قۇندىلىعى – وسىندا»، - دەدى پرەزيدەنت.
قاسىم-جومارت توقايەۆ ادىلەتتىلىك تۋرالى ايتا وتىرىپ، تۇڭعىش پرەزيدەنت نۇرسۇلتان نازاربايەۆتىڭ ەلىمىزدىڭ ەگەمەندىككە جەتۋىنە قوسقان ەلەۋلى ۇلەسى بارىن اتاپ ءوتتى.
«تۇپتەپ كەلگەندە، تاۋەلسىزدىككە قالاي قول جەتكىزىپ، باياندى ەتە العانىمىز ماڭىزدى. وكىنىشكە قاراي، بۇل كۇن ەلىمىزدە ءبىراز جىل ءوز دەڭگەيىندە اتاپ وتىلگەن جوق. ءبىراق، تاريحي ادىلدىك ورنادى»، - دەدى ول.
قازاقستان پرەزيدەنتى رەسپۋبليكا كۇنىنە ۇلتتىق مەرەكە مارتەبەسىن قايتارۋ ۇسىنىسىن ۇلىتاۋدا وتكەن القالى جيىندا ايتقانىن ەسكە سالدى.
«بۇل باستاما حالىقتىڭ كەڭ قولداۋىنا يە بولىپ، ءتيىستى زاڭعا وزگەرىس ەنگىزىلدى. بيىلدان باستاپ رەسپۋبليكا كۇنى – ۇلتتىق مەرەكە. ەندى بۇل مەيرامدى ەل بولىپ جاڭا مازمۇندا اتاپ وتەتىن بولامىز. قايتا جاڭعىرعان رەسپۋبليكا كۇنى – بۇل حالقىمىزدىڭ رۋحىن كوتەرىپ، ەلدىگىمىزدى نىعايتا تۇسەتىن اسا ماڭىزدى تاريحي قادام. سوندىقتان، وسى مەرەيلى كۇن ازاماتتارىمىزدىڭ ءوزارا تۇسىنىستىگىن، تۇتاس ۇلتىمىزدىڭ ەركىن ومىرگە جانە دەربەس دامۋعا ۇمتىلىسىن پاش ەتەتىن مەرەكە بولماق»، - دەدى قاسىم-جومارت توقايەۆ.