كەزدەسۋدە بۇعان دەيىن جوعارى دەڭگەيدە قول جەتكىزىلگەن ۋاعدالاستىقتاردى جۇزەگە اسىرۋ ماسەلەلەرى تالقىلاندى.
مەملەكەت باسشىسى ءباا-نىڭ قازاقستانداعى ەلشىسى مۇحاممەد سايد مۇحاممەد ال-اريكيدى قابىلدادى، دەپ حابارلايدى Almaty-akshamy.kz اقورداعا سىلتەمە جاساپ.
مەملەكەت باسشىسى ساۋدا-ەكونوميكا سالاسى ەكىجاقتى بايلانىستاردىڭ باستى باعىتى سانالاتىنىن ايتتى. بۇل رەتتە ەكى ەلدىڭ ۇكىمەتتەرىنە تاياۋ كەلەشەكتە ساۋدا-ساتتىق كولەمىن 1 ميلليارد دوللارعا دەيىن جەتكىزۋ مىندەتى جۇكتەلگەنىن ەسكە سالدى.
پرەزيدەنت ستراتەگيالىق ينۆەستيسيالىق جوبالار تۋرالى بىرلەسكەن مالىمدەمەگە سايكەس ەنەرگەتيكا، اۋىل شارۋاشىلىعى، كولىك جانە لوگيستيكا سالالارىنداعى قارىم-قاتىناستى ودان ءارى نىعايتۋدىڭ ماڭىزدىلىعىنا نازار اۋداردى.
قاسىم-جومارت توقايەۆ امىرلىكتەردىڭ Masdar كومپانياسىمەن جاڭارتىلاتىن ەنەرگيا كوزدەرى سالاسىنداعى بىرلەسكەن جوبالاردى ىلگەرىلەتۋ بويىنشا ىنتىماقتاستىقتىڭ قارقىندى دامىپ كەلە جاتقانىن، سونداي-اق AD Ports Group جانە Terminals Holding كومپانيالارىمەن بىرلەسىپ كولىك-لوگيستيكا جەلىسى مەن اۋە تاسىمالى قىزمەتتەرىن كەڭەيتۋدى كوزدەيتىن ينۆەستيسيالىق جوبالاردىڭ جۇزەگە اسىرىلا باستاعانىن اتاپ ءوتتى.
اڭگىمەلەسۋ بارىسىندا اقپاراتتىق تەحنولوگيالاردى دامىتۋ باعىتىنداعى ىقپالداستىق ماسەلەسىنە ايرىقشا ءمان بەرىلدى.
پرەزيدەنت قازاقستان مەن امىرلىكتەر اراسىنداعى دوستىق پەن ىنتىماقتاستى نىعايتۋعا زور ەڭبەك سىڭىرگەنى ءۇشىن مۇحاممەد سايد مۇحاممەد ال-اريكيدى II دارەجەلى «دوستىق» وردەنىمەن ماراپاتتادى.