قازاقستان مەن ءازىربايجاننىڭ پارلامەنتارالىق ديالوگى جاندانىپ كەلەدى
كەزدەسۋ بارىسىندا قاسىم-جومارت توقايەۆ قازاقستان مەن ءازىربايجان اراسىنداعى قاتىناستاردىڭ ەرەكشە سيپاتقا يە ەكەنىن ايتتى، دەپ حابارلايدى Almaty-akshamy.kz اقوردانىڭ رەسمي سايتىنا سىلتەمە جاساپ.
«سوڭعى جىلدارى مەملەكەتارالىق ىنتىماقتاستىعىمىز قارقىندى دامىپ كەلەدى. ءازىربايجان پرەزيدەنتى يلحام الييەۆپەن ءاردايىم بايلانىستامىن. ءبىز ەلدەرىمىز اراسىنداعى ءوزارا قارىم-قاتىناستاردىڭ قازىرگى جاعدايى مەن دامۋ پەرسپەكتيۆالارى تۋرالى ۇنەمى پىكىر الماسامىز. تاۋەلسىزدىك العان ۋاقىتتان بەرى ەلدەرىمىز اراسىنداعى ىنتىماقتاستىقتى تابىستى جالعاستىرىپ كەلەمىز»، – دەدى پرەزيدەنت.
مەملەكەت باسشىسى ەكى ەلدىڭ پارلامەنتارالىق ديالوگىنىڭ جاندانىپ كەلە جاتقانىن ەرەكشە اتاپ ءوتتى.
«كەيىنگى جىلدارى پارلامەنتتىك ديپلوماتيا بىرتە-بىرتە ساياسي ماڭىزعا يە بولىپ كەلەدى. تۇركپا-نىڭ جۋىردا وتكەن وتىرىسىنىڭ قورىتىندىلارى – مۇنىڭ انىق دالەلى. اتالعان جيىن وتە تابىستى بولدى جانە بىرلەسكەن وتە مازمۇندى قۇجات قابىلداندى»، – دەدى قاسىم-جومارت توقايەۆ.
ميللي ءماجىلىس سپيكەرى كەزدەسۋگە مۇمكىندىك بەرگەنى ءۇشىن مەملەكەت باسشىسىنا العىس ايتىپ، پرەزيدەنت يلحام الييەۆتىڭ جۇرەكجاردى سالەمىن جەتكىزدى. سونىمەن قاتار تۇركپا جۇمىسىنىڭ قورىتىندىلارى تۋرالى ايتتى.
«ءبىز اسسامبلەيانىڭ جۇمىسىنا اتسالىسقانىمىزعا وتە قۋانىشتىمىز. قازاق حالقىنىڭ رۋحاني ورتالىعى – تۇركىستاندا بولعان ەكى كۇن ىشىندە وندا اتقارىلىپ جاتقان اۋقىمدى جۇمىستارعا كۋا بولدىق. كورگەنىمىزدىڭ ءبارى ءبىزدى قاتتى تامساندىردى. ءازىربايجان مەن قازاقستان - باۋىرلاس مەملەكەتتەر. ءبىزدى تۇركىلىك تامىرىمىز، ورتاق مادەنيەتىمىز بەن ءداستۇرىمىزدىڭ ۇقساستىعى سياقتى كوپ دۇنيەلەر بىرىكتىرەدى. سونىمەن قاتار ءازىربايجان مەن قازاقستان – ستراتەگيالىق سەرىكتەستەر»، – دەدى ساگيبا گافاروۆا.