1953 جىلى 17 مامىردا دۇنيەگە كەلگەن.
بۇدان بۇرىن حابارلاعانىمىزداي، مەملەكەت باسشىسى تۋعان كۇنىن تويلامايدى، بۇگىن جۇڭگو حالىق رەسپۋبليكاسىندا مەملەكەتتىك ساپارمەن ءجۇر، دەپ حابارلايدى Almaty-akshamy.kz
قاسىم-جومارت كەمەل ۇلى توقايەۆ 1953 جىلى 17 مامىردا الماتى قالاسىندا تۋعان. اكەسى – كەمەل توقايەۆ (1923-1986) ۇلى وتان سوعىسىنىڭ ارداگەرى، بەلگىلى جازۋشى، قازاق ادەبيەتىنىڭ دەتەكتيۆ جانرىنىڭ نەگىزىن قالاۋشى. شەشەسى – تۇرار شاباربايەۆا (1931-2000) الماتى شەت تىلدەرى پەداگوگيكالىق ينستيتۋتىندا قىزمەت ەتكەن.
بولاشاق پرەزيدەنت №25 ءىلياس ەسەنبەرلين اتىنداعى مەكتەپ-گيمنازيادا ءبىلىم العان.
ق.ك.توقايەۆ 1975 جىلى ماسكەۋ مەملەكەتتىك حالىقارالىق قاتىناستار ينستيتۋت بىتىرگەن. كسرو-نىڭ جۇڭگو حالىق رەسپۋبليكاسىنداعى ەلشىلىگىندە ديپلوم الدىنداعى تاعىلىمدامادان وتكەن. 1983-1984 جىلدار ارالىعىندا بەيجىڭ لينگۆيستيكا ينستيتۋتىندا تاعىلىمدامادان ءوتتى. 1992 جىلى رەسەي فەدەراسياسى سىرتقى ىستەر مينيسترلىگىنىڭ ديپلوماتيالىق اكادەمياسىن ءتامامدادى.
ەڭبەك جولىن 1975 جىلى كسرو-نىڭ سىرتقى ىستەر مينيسترلىگىندە باستاپ، كەڭەس وداعىنىڭ سينگاپۋر رەسپۋبليكاسىنداعى ەلشىلىگىنە جۇمىسقا جولدانعان. 1979 جىلى كسرو سىرتقى ىستەر مينيسترلىگىنىڭ اپپاراتىنا ورالادى. 1984-1985 جىلدار ارالىعىندا كسرو سىرتقى ىستەر مينيسترلىگىندە قىزمەت اتقارىپ، كەيىننەن كەڭەس وداعىنىڭ جۇڭگو حالىق رەسپۋبليكاسىنداعى ەلشىلىگىنە جىبەرىلدى. وندا 1991 جىلعا دەيىن ەكىنشى حاتشى، ءبىرىنشى حاتشى جانە كەڭەسشى لاۋازىمدارىندا قىزمەت ىستەيدى.
1992 جىلى قازاقستان رەسپۋبليكاسىنىڭ سىرتقى ىستەر ءمينيسترىنىڭ ورىنباسارى بولىپ تاعايىندالادى. 1993 جىلى قازاقستان رەسپۋبليكاسىنىڭ سىرتقى ىستەر ءمينيسترىنىڭ ءبىرىنشى ورىنباسارى بولدى. 1994 جىلى ەلىمىزدىڭ سىرتقى ىستەر ءمينيسترى بولىپ تاعايىندالادى. 1999 جىلعى ناۋرىزدا قازاقستان رەسپۋبليكاسى پرەمەر-مينيسترىنىڭ ورىنباسارى بولدى. 1999 جىلعى قازاندا پارلامەنتتىڭ كەلىسىمى بويىنشا قازاقستان رەسپۋبليكاسى پرەزيدەنتىنىڭ جارلىعىمەن پرەمەر-مينيستر بولىپ تاعايىندالدى. 2002 جىلعى قاڭتاردا قازاقستان رەسپۋبليكاسىنىڭ مەملەكەتتىك حاتشىسى – سىرتقى ىستەر ءمينيسترى بولدى. 2003-2007 جىلدارى – قازاقستان رەسپۋبليكاسىنىڭ سىرتقى ىستەر ءمينيسترى. بۇل قىزمەتتە جاھاندىق يادرولىق قارۋ-جاراقتى تاراتپاۋ ۇدەرىسىنە بەلسەندى اتسالىستى.
2007 جىلعى قاڭتاردا قازاقستان رەسپۋبليكاسى پارلامەنت سەناتىنىڭ ءتوراعاسى بولىپ سايلاندى. 2008 جىلى قازاقستان پارلامەنتىنىڭ جوعارى پالاتاسىنىڭ سپيكەرى رەتىندە ەقىۇ پارلامەنتتىك اسسامبلەياسىنىڭ ۆيسە-پرەزيدەنتى بولىپ سايلاندى.
2011 جىلعى ناۋرىزدا بۇۇ باس حاتشىسىنىڭ ورىنباسارى، بۇۇ-نىڭ جەنيەۆاداعى بولىمشەسىنىڭ باس ديرەكتورى، سونداي-اق قارۋسىزدانۋ جونىندەگى كونفەرەنسيادا بۇۇ باس حاتشىسىنىڭ جەكە وكىلى بولىپ تاعايىندالدى. سونىمەن قاتار قارۋسىزدانۋ جونىندەگى كونفەرەنسيانىڭ باس حاتشىسى لاۋازىمىن اتقاردى. تمد-نىڭ جانە شانحاي ىنتىماقتاستىق ۇيىمىنىڭ سىرتقى ىستەر مينيسترلەرى كەڭەسىنىڭ ءتوراعاسى بولىپ سايلاندى.
2013 جىلعى 16 قازاندا قازاقستان رەسپۋبليكاسى پارلامەنت سەناتىنىڭ ءتوراعاسى بولىپ قايتا سايلاندى.
2019 جىلعى 20 ناۋرىزدا قازاقستان رەسپۋبليكاسىنىڭ پرەزيدەنتى رەتىندە انت قابىلدادى.
2019 جىلى 9 ماۋسىمدا وتكەن كەزەكتەن تىس پرەزيدەنت سايلاۋىندا 70،96 پايىز داۋىس جيناپ، قازاقستان رەسپۋبليكاسىنىڭ پرەزيدەنتى بولىپ سايلاندى. 2019 جىلى 12 ماۋسىمدا ق ر كونستيتۋسياسىنىڭ 42-بابىنا سايكەس انت بەرىپ، رەسمي تۇردە سايلانعان پرەزيدەنت رەتىندە مەملەكەت باسشىسىنىڭ لاۋازىمىنا كىرىستى.
قاسىم-جومارت توقايەۆ 2022 جىلدىڭ 20 قاراشاسىندا وتكەن كەزەكتەن تىس پرەزيدەنت سايلاۋىندا 81،31% داۋىس جيناپ، جەڭىسكە جەتتى. 2022 جىلى 26 قاراشادا قازاقستان رەسپۋبليكاسى پرەزيدەنتىن سالتاناتتى ۇلىقتاۋ ءراسىمى ءوتتى.
2021 جىلى ءساۋىر ايىنان باستاپ قازاقستان حالقى اسسامبلەياسىنىڭ ءتوراعاسى. 2022 جىلى قاڭتار ايىنان باستاپ قازاقستان رەسپۋبليكاسى قاۋىپسىزدىك كەڭەسىنىڭ ءتوراعاسى. توتەنشە جانە وكىلەتتى ەلشى. ساياسي عىلىمدارىنىڭ دوكتورى. دۇنيەجۇزىلىك گۋمانيتارلىق جانە جاراتىلىستانۋ عىلىمدارى اكادەمياسىنىڭ تولىق مۇشەسى. قاۋىپسىزدىك جونىندەگى ميۋنحەن كونفەرەنسياسى «عۇلامالار كەڭەسىنىڭ» مۇشەسى. شەنچجەن ۋنيۆەرسيتەتىنىڭ (قحر) جانە رەسەي فەدەراسياسىنىڭ سىرتقى ىستەر مينيسترلىگى ديپلوماتيالىق اكادەمياسىنىڭ قۇرمەتتى پروفەسسورى. قازاقستاننىڭ حالىقارالىق قاتىناستار جونىندەگى كەڭەسىنىڭ قۇرمەتتى پرەزيدەنتى. جەنيەۆا ديپلوماتيا جانە حالىقارالىق قاتىناستار مەكتەبىنىڭ قۇرمەتتى دەكانى. رەسەي بيوگرافيالىق قوعامىنىڭ تۇجىرىمى بويىنشا 2018 جىلدىڭ «جىل ادامى» لاۋرەاتتارىنىڭ تىزىمىنە ەنگەن.
13 جىل بويى قازاقستاننىڭ ۇستەل تەننيسى فەدەراسياسىن باسقاردى.
حالىقارالىق قاتىناستار ماسەلەلەرىنە ارنالعان 10 كىتاپتىڭ اۆتورى.
قازاقستان رەسپۋبليكاسىنىڭ جانە شەت ەلدەردىڭ كوپتەگەن مەملەكەتتىك ناگرادالارىمەن، سونداي-اق مەدالدارمەن ماراپاتتالعان.
سالاۋاتتى ءومىر سالتىن ۇستانادى. كوركەم شىعارمالاردى، ساياسي جانە مەمۋارلىق باعىتتاعى ادەبيەتتەردى وقىعاندى ۇناتادى.