قازاقستان رەسپۋبليكاسى ىشكى ىستەر مينيسترلىگى تۇرعىنداردى تىركەۋ قاجەتتىلىگىن تاعى دا ەسكە سالدى. قۇقىق بۇزۋشىلىقتىڭ الدىن الۋ ماقساتىندا پوليسيا "رەزەڭكە" پاتەرلەردى تەكسەرۋدى باستايدى. بۇل شارانىڭ نەگىزگى ماقساتى — زاڭسىز كوشى-قوندى توقتاتۋ، دەپ حابارلايدى aqshamnews.kz
ىشكى ىستەر مينيسترلىگىنىڭ وكىلدەرى ازاماتتاردى تىركەۋسىز، قۇجاتسىز تۇرۋ نەمەسە ۋاقىتشا تۇرۋعا تىركەۋ جاساماي تۇرۋ زاڭمەن جازالانىپ، ايىپپۇل سالىناتىنىن ەسكەرتتى.
قازىرگى تاڭدا تىركەۋدەن ءوتۋ وتە وڭاي:
- ءبىرىنشى ءادىس — كەز كەلگەن حالىققا قىزمەت كورسەتۋ ورتالىعىنا بارۋ. ول ءۇشىن جەكە كۋالىك پەن تۇرعىن ءۇي يەسىنىڭ قاتىسۋى قاجەت.
- ەكىنشى ءادىس — "ەلەكتروندى ۇكىمەت" پورتالى ارقىلى ونلاين تىركەلۋ. بۇل تاسىلدە ازامات ءوتىنىش بەرەدى، ال تۇرعىن ءۇي يەسى كەلىسىمىن بىلدىرەدى.
- ءۇشىنشى ءادىس — ىشكى ىستەر مينيسترلىگى مەن بانكتەردىڭ ءموبيلدى قوسىمشالارى ارقىلى تىركەۋ. بۇل ءادىس SMS-پارول ارقىلى ازاماتتىڭ جەكە باسىن تەكسەرۋ، تىركەۋ جانە تۇرعىن ءۇي يەسىنىڭ كەلىسىمىن الۋ مۇمكىندىگىن ۇسىنادى.
وسى ادىستەر ارقىلى ازاماتتار تىركەۋدەن ءوتىپ، زاڭ تالاپتارىنا ساي بولا الادى.